काठमाडौं । विद्यालय तथा कलेज तहका प्रतिभावान खेलाडीलाई राष्ट्रियस्तरको प्रतिस्पर्धात्मक मञ्च प्रदान गर्दै नेपाली भलिबलको भविष्य निर्माण गर्ने उद्देश्यसहित एन्जल्स हार्ट माध्यमिक विद्यालय/कलेज, मनमैजु ले दोस्रो राष्ट्रिय एन्जल्स हार्ट अन्तरविद्यालय/कलेज स्तरीय पुरुष भलिबल प्रतियोगिता–२०८३ आयोजना गर्ने भएको छ । प्रतियोगिता जेठ २३ देखि २६ गतेसम्म मनमैजुस्थित एन्जल्स स्पोर्ट्स एकेडेमी एन्ड रिक्रिएसन सेन्टरमा सञ्चालन हुनेछ ।
नेपाल भलिबल संघ, राष्ट्रिय परीक्षा बोर्ड, हिसान, प्याब्सन, एन–प्याब्सन, नेपाल विद्यालय भलिबल कमिसन तथा तारकेश्वर नगर शिक्षा विभागलगायत विभिन्न संस्थाको समन्वयमा आयोजना हुन लागेको प्रतियोगितामा देशभरका ५० भन्दा बढी टोलीको सहभागिता रहने अपेक्षा गरिएको छ ।
आयोजकका अनुसार कक्षा १२ सम्म अध्ययनरत तथा हालै कक्षा १२ उत्तीर्ण गरेका विद्यार्थीहरूले प्रतियोगितामा सहभागिता जनाउन सक्नेछन् । २०८२ सालको एसइई परीक्षा दिएका तथा कक्षा ११ र १२ मा अध्ययनरत, राष्ट्रिय परीक्षा बोर्डमा दर्ता भएका १८ वर्ष ननाघेका विद्यार्थी प्रतियोगिताका लागि योग्य हुनेछन् ।
प्रतियोगितामा प्रथम हुने टोलीले ५० हजार रुपैयाँ नगदसहित ट्रफी, स्वर्ण पदक र प्रमाणपत्र प्राप्त गर्नेछ भने दोस्रो र तेस्रो हुने टोलीले क्रमशः ३० हजार र १५ हजार रुपैयाँ नगदसहित ट्रफी, पदक तथा प्रमाणपत्र प्राप्त गर्नेछन् । व्यक्तिगत विधातर्फ बेस्ट स्पाइकर, बेस्ट लिफ्टर, बेस्ट सर्भर, बेस्ट ब्लकर र बेस्ट डिफेन्सलाई जनही दुई हजार रुपैयाँ नगदसहित स्वर्ण पदक प्रदान गरिनेछ । त्यस्तै बेस्ट प्लेयरलाई तीन हजार रुपैयाँ नगद, स्वर्ण पदक र प्रमाणपत्र प्रदान गरिनेछ ।
एन्जल्स हार्ट फाउन्डेसनका कार्यकारी अध्यक्ष लिलबहादुर पुनले विद्यालय तथा कलेज तहका खेलाडीलाई राष्ट्रियस्तरको प्रतिस्पर्धात्मक अवसर उपलब्ध गराउँदै भलिबल खेलको दीर्घकालीन विकासमा योगदान पुर्याउने उद्देश्यले प्रतियोगिता आयोजना गरिएको बताउनु भयाे । उहाँले एन्जल्स हार्टले शिक्षासँगै खेलकुद, नेतृत्व विकास, व्यक्तित्व निर्माण तथा युवामुखी विभिन्न कार्यक्रममार्फत विद्यार्थीको सर्वाङ्गीण विकासमा निरन्तर काम गर्दै आएको उल्लेख गर्नु भयाे ।
अध्यक्ष पुनका अनुसार प्रतियोगितालाई आगामी वर्षहरूमा अझ व्यवस्थित, प्रभावकारी र व्यापक बनाउँदै राष्ट्रियस्तरको प्रतिष्ठित विद्यालय भलिबल प्रतियोगिताका रूपमा विकास गर्ने लक्ष्य राखिएको छ । विद्यालय तथा कलेज तहमा लुकेर रहेका प्रतिभालाई पहिचान र प्रोत्साहन गर्दै राष्ट्रिय टोलीका लागि दक्ष खेलाडी उत्पादनमा समेत यस प्रतियोगिताले महत्वपूर्ण भूमिका खेल्ने विश्वास उहाँले व्यक्त गर्नुभयाे ।
प्रतियोगिता सञ्चालनका लागि करिब ६ लाख ३० हजार रुपैयाँ खर्च हुने अनुमान गरिएको छ । उक्त रकम पुरस्कार, सुरक्षा व्यवस्था, उद्घाटन तथा समापन समारोह, रेफ्री तथा अफिसियल व्यवस्थापन, प्रचारप्रसार तथा बाहिरी जिल्लाबाट आउने टोलीहरूको आवास र भोजन व्यवस्थामा खर्च गरिने आयोजकले जनाएको छ ।
एन्जल्स हार्टले विगतदेखि नै शिक्षासँगै खेलकुद क्षेत्रलाई प्राथमिकतामा राख्दै विभिन्न अन्तरविद्यालय प्रतियोगिता, खेलकुद प्रशिक्षण तथा युवा प्रतिभा प्रोत्साहनका कार्यक्रम सञ्चालन गर्दै आएको छ । सोही अभियानको निरन्तरतास्वरूप आयोजना हुन लागेको यो प्रतियोगिताले विद्यालयस्तरको भलिबल विकासमा थप ऊर्जा प्रदान गर्ने विश्वास गरिएको छ ।
