काठमाडौं । भारतीय पक्षले नेपाली चियाको निर्यातमा नयाँ अवरोध खडा गरेपछि नेपालका चिया उद्योग र बगान बिहीबारदेखि ठप्प छन् । असार १ देखि इलामका ५३ चिया उद्योग बन्द भइसकेका थिए भने ४ गतेदेखि झापाका ३० भन्दा बढी उद्योग र बगानसमेत बन्द भएका छन् ।
भारतीय सीमा नाकामा नेपाली तयारी चियाको गुणस्तर परीक्षणका नाममा रोक लगाइएपछि उद्योग सञ्चालन असम्भव बनेको हो । संघका अनुसार भारतको इन्डियन टी बोर्डले हालै लागू गरेको नयाँ स्ट्यान्डर्ड अपरेटिङ प्रोसिड्योर (एसओपी) का कारण नेपाली चिया निर्यात प्रभावित भएको छ । यसअघि वर्षौंदेखि निर्यात हुँदै आएको चियालाई सीमामै रोकेर परीक्षण प्रक्रिया थप जटिल बनाइएपछि उद्योगीहरू समस्यामा परेका छन्।
व्यवसायीहरूको तथ्यांक अनुसार कुल उत्पादनमध्ये ५ अर्ब रुपैयाँभन्दा बढीको चिया भारतमा मात्रै निर्यात हुँदै आएको छ । ९० प्रतिशतसम्म चिया भारत निर्यात हुने गरेको छ ।
उद्योग, वाणिज्य तथा आपूर्ति मन्त्री गौरी कुमारीले निर्यात खुलाउन कुटनीति पहल भइरहेको जानकारी दिनुभएको छ। उहाँले सरकारले आवश्यक कुटनीतिक पहल लिइरहेको जानकारी दिएपनि उद्योगीहरु सरकारले उद्योगी र श्रमिकको मर्का नसुनेको गुनासो गर्छन ।
उसो त बिहीबार मात्र पनि उद्योग वाणिज्य महासंघको अध्यक्ष अञ्जनकुमार श्रेष्ठ र वरिष्ठ उपाध्यक्ष सुरकृष्ण वैद्यलगायतको टोलीले परराष्ट् मन्त्री शिशिर खनाललाई भेटेर निर्यात खुलाउन पहल गर्न आग्रह गरेका छन् । मन्त्री खनालले भारतसँग कुराकानी भइरहेकाले एकसाता भित्र समस्या समाधान हुने आश्वासन दिएको वरिष्ठ उपाध्यक्ष वैद्यले जानकारी दिनुभयो ।
बगान र उद्योग बन्द हुँदा यो क्षेत्रमा प्रत्यक्ष रूपमा आश्रित करिब ६० हजार श्रमिक, कर्मचारी र किसानको रोजीरोटी गम्भीर संकटमा परेको छ ।
