काठमाडौं । नेपाली कांग्रेसले गोपालमान श्रेष्ठलाई वरिष्ठ नेता बनाएको छ ।
४४औँ बीपी स्मृति तथा ‘जरा अभियान’ समापन एवं नयाँ अभियान घोषणाका लागि राष्ट्रिय सभागृहमा बिहीबार आयोजित कार्यक्रममा सभापति गगन थापाले केन्द्रीय समितिबाट अनुमोदन हुने गरी श्रेष्ठलाई वरिष्ठ नेता बनाउने घोषणा गरेका हुन् ।
‘गोपालमान श्रेष्ठको स्वास्थ्य अवस्था नाजुक छ । साउन १२ र १३ गते केन्द्रीय समिति बैठक बस्दै छ । उक्त बैठकबाट अनुमोदन हुने गरी उहाँलाई पार्टीको वरिष्ठ नेता बनाउने घोषणा गर्दछु,’ थापाले भने ।
श्रेष्ठले कार्यवाहक सभापति, उपसभापतिलगायत विभिन्न जिम्मेवारीमा रहेर पार्टीमा पुर्याएको योगदानको सम्मान गर्दै उनलाई वरिष्ठ नेता बनाउने निर्णय गरिएको सभापति थापाले बताए ।
क्यान्सरबाट पीडित श्रेष्ठ विगत १० दिनदेखि आइसियुमा उपचाररत छन्।
