उपायको आक्रामक विस्तार : एक वर्षमै कारोबार ५४ प्रतिशतले वृद्धि

काठमाडौं । नेपालको लजिस्टिक्स क्षेत्रमा सक्रिय कम्पनी उपायले पछिल्लो एक वर्षमा उल्लेखनीय व्यावसायिक विस्तार गरेको जनाएको छ । कम्पनीका अनुसार, एक वर्षको अवधिमा कारोबार रकम ५४ प्रतिशतले वृद्धि हुनुका साथै कर्मचारी संख्या ३८० बाट बढेर १५ सयभन्दा बढी पुगेको छ ।

ई–कमर्स, डिजिटल व्यापार तथा छिटो र भरपर्दो डेलिभरी सेवाको बढ्दो मागसँगै लजिस्टिक्स क्षेत्रमा लगानी र पूर्वाधार विकास तीव्र बन्दै गएको अवस्थामा उपायले आफ्नो सेवा सञ्जाललाई देशव्यापी रूपमा विस्तार गरेको हो ।

सन् २०२० मा स्थापना भएको उपायले प्रविधिमा आधारित लजिस्टिक्स सेवामार्फत नेपालभरका व्यवसाय, अनलाइन विक्रेता, ई–कमर्स उद्योग तथा उपभोक्तालाई जोड्दै आएको छ । कम्पनीका अनुसार हाल ४०० भन्दा बढी शाखा तथा सेवा केन्द्रमार्फत नेपालको सबै जिल्लाका ५ हजारभन्दा बढी वितरण स्थलमा सेवा पुगिसकेको छ ।

कम्पनीले दैनिक पार्सल वितरण क्षमतामा पनि उल्लेखनीय वृद्धि गरेको जनाएको छ । केही वर्षअघि दैनिक करिब १ हजार पार्सल वितरण गर्दै आएको उपायले हाल औसत १५ हजार पार्सल प्रतिदिन वितरण गरिरहेको छ ।

कम्पनीका अनुसार पछिल्लो एक वर्षमा प्रत्यक्ष रोजगारीसँगै डेलिभरी पार्टनर, स्थानीयवासी, ट्रान्सपोर्ट साझेदार तथा अन्य सेवा प्रदायकमार्फत अप्रत्यक्ष रूपमा ५ हजारभन्दा बढी रोजगारी सिर्जना भएको छ ।

साँगामा वेयरहाउस निर्माण हुँदै

उपाय वेयरहाउसिङले काभ्रेको साँगामा १८ रोपनीभन्दा बढी आफ्नै जग्गामा करिब ४५ हजार वर्गफुट क्षेत्रफलमा अत्याधुनिक ३ पिएल (थर्ड–पार्टी लजिस्टिक्स) वेयरहाउस निर्माण गरिरहेको जनाएको छ ।

कम्पनीका अनुसार उक्त वेयरहाउसको कुल भण्डारण क्षमता १ लाख ४० हजार वर्गफुटभन्दा बढी हुनेछ । आगामी ६ महिनाभित्र निर्माण सम्पन्न गर्ने लक्ष्य राखिएको परियोजना सञ्चालनमा आएपछि स्टोरेज, इन्भेन्ट्री व्यवस्थापन, पिक एन्ड प्याक, फुलफिलमेन्ट तथा देशव्यापी वितरणलगायत एकीकृत ३पीएल सेवा एउटै स्थानबाट उपलब्ध गराइनेछ ।

हाल उपायले ई–कमर्स कम्पनी, साना तथा मझौला व्यवसाय, उत्पादन उद्योग, जलविद्युत् परियोजना तथा रिटेल ब्रान्डहरूलाई एन्ड–टु–एन्ड लजिस्टिक्स समाधान उपलब्ध गराउँदै आएको छ । सेलर पोर्टल, रियल–टाइम ट्र्याकिङ, प्रुफ अफ डेलिभरी, फुलफिलमेन्ट सेवा, एयर कार्गो, इन्टिग्रेसन कार्गो सेवा तथा देशव्यापी वितरण सञ्जालमार्फत कम्पनीले डिजिटल व्यापारलाई सहज बनाउँदै आएको जनाएको छ ।

आगामी दिनमा देशव्यापी नेटवर्क विस्तार, थप ३पीएल वेयरहाउस तथा फुलफिलमेन्ट सेवा सञ्चालनका साथै एआईमा आधारित प्रविधि र आधुनिक लजिस्टिक्स पूर्वाधारमा थप लगानी गर्ने योजना उपायले सार्वजनिक गरेको छ ।