काठमाडौं । प्रतिनिधि सभाअन्तर्गत उद्योग तथा वाणिज्य तथा श्रम तथा उपभोक्ता हित समितिका सभापति रहबर अन्सारीले एलपी ग्यास सिलिण्डरको म्यापिङ तत्काल सुरु गर्न नेपाल आयल निगमलाई निर्देशन दिएका छन् ।
समितिको मंगलबार बसेको बैठकमा अन्सारीले देशभर रहेका करिब एक करोड ७५ लाख एलपी ग्यास सिलिण्डरको म्यापिङ गरी कृत्रिम अभाव अन्त्य गर्न निगमलाई निर्देशन दिएका हुन् । उनले १७ दिनअघि पनि सिलिण्डर म्यापिङ गर्न निर्देशन दिएको उल्लेख गर्दै त्यसको कार्यान्वयन नभएकोप्रति असन्तुष्टि जनाए ।
अन्सारीले समितिको गतिसँग तालमेल गर्न नसके आयल निगमको नेतृत्वले जिम्मेवारी छाड्नुपर्ने चेतावनी दिए । उनले प्रत्येक ग्यास सिलिण्डरमा बारकोड वा क्यूआर कोड राखी डिजिटल प्रणालीमार्फत ट्र्याकिङ गर्नुपर्नेमा जोड दिए ।
‘हामीलाई कसैको प्रेसर छैन, हामीलाई जनताको प्रेसर छ । यदि सरकारको स्पिड यो समितिको स्पिडसँग म्याच हुन सक्दैन भने राजीनामा बुझाइदिनूस् । यो देशमा धेरै ट्यालेन्टेड व्यक्तिहरू छन्, काम गरेर देखाउने मान्छे पनि छन्,’ उनले भने ।
उनले ३० दिनभित्र कोड नभएका सिलिण्डर साटफेर रोक्ने व्यवस्था गरिए बजारमा लुकाइएका सिलिण्डर स्वतः बाहिर आउने दाबी गरे । अन्सारीले नेपाल विद्युत प्राधिकरणको घरधुरी विवरणसँग ग्यास सिलिण्डरको विवरण जोडेर कुन सिलिण्डर कहाँ, कुन कम्पनीको र कसको प्रयोगमा छ भन्ने विवरण राज्यसँग हुनुपर्ने बताए ।
सभापति अन्सारीले ग्यासको समान मूल्य नीति पुनरावलोकन गर्न पनि सरकारलाई आग्रह गरे । उनका अनुसार हाल १४।२ केजीको घरेलु सिलिण्डर पाँचतारे होटल, ठूला उद्योग र व्यावसायिक प्रतिष्ठानले समेत प्रयोग गरिरहेका कारण सरकारले ठूलो परिमाणमा अनुदानको भार व्यहोर्नुपरेको छ ।
‘एउटा फाइभ स्टार होटलले महिनाको ३०० सिलिण्डर प्रयोग गरिरहेको छ, उसलाई १४.२ किलोको सट्टा १०० वा ४५० किलोको सिलिण्डर उपलब्ध गराउन सकिन्छ । ५ किलोको सिलिण्डर विद्यार्थी, डेरावासी र न्यून खपत हुने उपभोक्ताका लागि दिनुपर्छ,’ उनले भने ।
अन्सारीका अनुसार सरकारले प्रत्येक घरेलु सिलिण्डरमा करिब ९३८ रुपैयाँ घाटा व्यहोर्दै आएको छ । मासिक करिब सात लाख सिलिण्डर व्यावसायिक क्षेत्रमा प्रयोग हुँदा राज्यको करिब ६५ करोड रुपैयाँ अनुदान त्यही क्षेत्रमा खर्च भइरहेको उनले बताए । वार्षिक रूपमा यो रकम अर्बौं रुपैयाँ पुग्ने भएकाले अनुदान वास्तविक घरेलु उपभोक्तामै केन्द्रित गर्नुपर्नेमा उनले जोड दिए ।
उनले व्यावसायिक प्रयोगका लागि ५०, १०० र ४५० केजी क्षमताका सिलिण्डर सञ्चालनमा ल्याउन तथा पाँचतारे होटल र ठूला उद्योगलाई बजार मूल्यमा ग्यास उपलब्ध गराउने व्यवस्था गर्न सरकारलाई आग्रह गरे ।
अन्सारीले ग्यास उत्पादक संघलाई पनि प्रविधिमैत्री र नवप्रवर्तनमुखी समाधानमा नेपाल आयल निगमसँग सहकार्य गर्न आग्रह गर्दै ग्यास सिलिण्डर म्यापिङ र व्यावसायिक सिलिण्डर प्रणाली लागू भएमा हाल देखिएको ग्यास अभाव, कृत्रिम मौज्दात र अनुदान दुरुपयोगको समस्या समाधान गर्न सकिने बताए ।
