काठमाडौँ । काठमाडौँ उपत्यकासहित देशका विभिन्न भागमा पछिल्ला केही दिनयता देखिएको खाना पकाउने एलपी ग्यासको अभाव अब क्रमशः सहज बन्दै गएको छ। नेपाल आयल निगमका अनुसार भारतबाट ग्यासको आयात निरन्तर बढाइएको र वितरण प्रणालीलाई चुस्त बनाइएका कारण बजारमा देखिएको दबाब कम हुँदै गएको हो।
गत असार ३१ गतेदेखि आधा सिलिन्डरको सट्टा १४.२ किलोग्रामको पूर्ण सिलिन्डर बिक्री गर्न थालेपछि सुरुमा केही अन्योल र अभावजस्तो देखिएको थियो। निगमका कार्यकारी निर्देशक नागेन्द्र साहले उपभोक्तालाई मागअनुसारको ग्यास उपलब्ध गराउन आपूर्ति बढाइएको जानकारी दिँदै इन्डियन आयल कर्पोरेसन (आइओसी) बाट समेत पूर्ण सहयोग भइरहेको बताएका छन्।
अहिले दैनिक एक सयभन्दा बढी बुलेट ग्यास आइओसीका रिफाइनरीबाट लोड भई नेपाल भित्रिरहेको छ। बजारमा कृत्रिम अभाव सिर्जना हुन नदिन निगमले गठन गरेको ‘क्विक रेस्पोन्स टिम’ ले उपभोक्ताबाट आएका पाँच सयभन्दा बढी गुनासोहरूलाई सम्बोधन गरिसकेको छ। निगमले पर्याप्त परिमाणमा ग्यास आयात भइरहेकाले अनावश्यक रूपमा ग्यासको भण्डारण नगर्न आम उपभोक्तालाई आग्रह गरेको छ।
