काठमाडौं । एउटै प्लेटफर्मबाट बैंकिङ, भुक्तानी तथा ऋण सेवा सुरु भएको छ । डिजिटल वित्तीय सेवा प्रदायक एमबैंक टेक्नोलोजिज र नेपाल बहुउद्देश्यीय सहकारी संस्था (एनएमसी–कोअप)बीच एकीकृत डिजिटल बैंकिङ, भुक्तानी तथा ऋण सेवा एउटै प्लेटफर्ममार्फत उपलब्ध गराउने गरी सम्झौता भएको हो ।
देशभर ५७ सेवा केन्द्रमार्फत १ लाख ५० हजारभन्दा बढी सदस्यलाई सेवा प्रदान गर्दै आएको एनएमसी(कोअपले अब आफ्ना सदस्यलाई एमबैंकको प्लेटफर्ममार्फत थप व्यापक डिजिटल वित्तीय सेवा उपलब्ध गराउने भएको छ । साझेदारीअन्तर्गत एनएमसी–कोअपका सदस्यहरूले एउटै मोबाइल एप्लिकेसनमार्फत मोबाइल बैंकिङ, क्यूआर पेमेन्ट, फन्ड ट्रान्सफर, युटिलिटी पेमेन्ट, डिजिटल पेमेन्ट तथा केवाइएम अपडेटलगायतका सेवा प्राप्त गर्न सक्ने छन् ।
साझेदारीले डिजिटल लेन्डिङ क्षेत्रमा पनि विशेष जोड दिएको छ । चरणबद्ध रूपमा सदस्यहरूले फिक्स्ड डिपोजिट तथा पिरियडिक खाताविरुद्ध ऋण, ऋण भुक्तानी, ऋण विवरण (लोन स्टेटमेन्ट) तथा नयाँ ऋण आवेदन जस्ता सेवा मोबाइल प्लेटफर्ममार्फत प्राप्त गर्न सक्नेछन् ।
डिजिटल प्रक्रियामार्फत आवश्यक कागजात पेस गर्ने र ऋण आवेदनको अवस्थाबारे जानकारी लिन सकिने भएकाले शाखामा प्रत्यक्ष उपस्थित हुनुपर्ने आवश्यकता कम हुने अपेक्षा गरिएको छ ।
एनएमसी मल्टिपर्पज को–अपरेटिभ लिमिटेडका प्रमुख कार्यकारी अधिकृत (सीईओ) तथा राष्ट्रिय सहकारी बैंक लिमिटेडका अध्यक्ष लक्ष्मीप्रसाद उप्रेतीले सहकारी क्षेत्रको दिगो विकासका लागि प्रविधिमैत्री सेवा विस्तार अपरिहार्य रहेको बताउँदै यस साझेदारीले सदस्यलाई सुरक्षित, सहज र आधुनिक वित्तीय सेवा प्रदान गर्ने बताए ।
