फागुन २३, काठमाडौं । नयाँ सरकार बनाउने ध्याउन्नमा शिर्ष दलका शिर्ष नेताहरुको दौडधुप दिनानुदिन तिब्र बन्दै छ। मन्त्रालय पुनर्गठन र राष्ट्रियसभाको अध्यक्षमा विवाद हुन थालेपछि सरकारबाट पाखा लगाइएको काङ्ग्रेस पुन सरकारमा फर्किन भएभरको इफोर्ट लगाइरहेको छ। यता पुर्व गठबन्धनको प्रमुख घटक दल काङ्ग्रेसलाई नै हटाएर एमाले र रास्वपा भित्राएका प्रचण्डलाई त्यतिले पनि पुगेको छैन। कतै आफ्नो बाहेक बैकल्पिक गठबन्धन बन्ने पो होकि भन्ने जगजगीले राती पनि सुत्न भुलेका प्रचण्डको अबको लक्ष्य भने माधव नेपाल हुन।
निर्वाचनमा थ्रेसहोल्ड समेत कटाउन नसकेपनि हरेक पटक सरकार निर्माणका क्रममा खाचो भित्र पर्दै आएको नेकपा एकीकृत समाजवादी पार्टी भने फेरि पनि प्रचण्डको नयाँ सरकारका लागी जरुरी रेखा भित्र छ। सोही कारण आफ्ना विरुद्ध अर्को गठबन्धन नबनोस भनेर निकै चतुर्याइँका साथ लागेका प्रचण्ड माधव नेपाललाई रिझाउन व्यस्त छन्।
यता पुरानो गठबन्धनबाट माओवादी बाहेक रहेलपहेल पार्टीलाई समेटेर फेरि सरकार बनाउन पो सकिन्छ कि भन्नेमा आस नमारेको काङ्ग्रेस पनि नेपाललाई आफू भन्दा पर राख्न चाहदैन। फलस्वरूप कोटेश्वर अवस्थित माधव कुमार नेपालको निवास अहिले ३ शिर्ष दलका ३ अध्यक्षहरुको पानी पधेरो बनेको छ।
अक्सर देख्नेहरुलाई काङ्ग्रेस सभापति देउवा प्रधानमन्त्री बन्न नपाएर दुखी छन् भन्ने लाग्छ। भागबन्डा अनुसार देउवाकै पालोमा गठबन्धन भत्किएको कुरा बितितै हुँदा नागरिकमा सो किसिमको सोच हुनु स्वभाविक पनि हो। तर हाल काङ्ग्रेस भने उस्तो ध्यायमा छैन। बरु सत्तामा दोस्रो शक्ति नै भएर बस्ने बानी परेको काङ्ग्रेसले यसपटक पनि रास्वपालाई प्रधानमन्त्रीको अफर गर्न थालेको छ।
सरकार हेरफेर हुने भएपछि रन्थनिएको काङ्ग्रेस यतिबेला आफुलाई सत्ता प्रमुख बनाउने भन्दापनि आफ्नो समर्थनमा प्रधानमन्त्री बनिदिने पात्रको खोजमा छ। जसको सानो झिलको काङ्ग्रेसले रबिलाई गरेको प्रधानमन्त्रीको प्रस्ताव हो।
एमाले, माओवादी,रास्वपा र जसपा बाहेक अन्य दलललाई बटुलेर कतै सरकार बनाउन पो सकिन्छ कि सोचेको काङ्ग्रेस मंगलवार देखी कसरत पनि थाल्यो। सुरुमा रन्थनिएर सास रहोउन्जेल आस मार्नु हुन्न भन्ने मान्यता तिर सोझिएका काङ्ग्रेस सभापति देउवा बुधबार श्रीमती आर्जु र पार्टी प्रमुख सचेतक लेखक बोकेर माधव निवास पुगे। जसोतसो छलफल गरि त्यहाँबाट निस्किएका देउवा उही साइत लोसपा अध्यक्ष महन्त ठाकुर निवास पुगे।
देउवाले देखाएको यो सक्रियताले प्रचण्ड विकल्प सरकार बन्नेपो होकि भन्ने सम्मको अर्को सोच जन्माएपनि यथार्थमा भने यो त्यति सहज छैन। सरकार बनाउन १ सय ३८ सांसदको समर्थन चाहिन्छ।जुन जुटाउने सम्भावना र सामर्थ्य दुबै काङ्ग्रेसमा देखिदैन। संसदको सबैभन्दा ठूलो दल रहेपनी समानुपातिक र प्रत्यक्ष गरि उ संग जम्मा ८९ सांसद छन्।काङ्ग्रेसका उनै ८९ सांसदसंग बाकी रहेका एकीकृत समाजवादीका १०, जनमत ५, लोसपाका ४ र नागरिक उन्मुक्ति पार्टीका ३ सांसद जोड्यो भने कुलमा १ सय ११ पुग्छ।
यो हिसाबले काङ्ग्रेस सरकार निर्माण गर्न सक्ने अवस्थामा छैन। कारणवस काङ्ग्रेसको प्रस्तावलाई रास्वपाले स्वीकार्यो भने पनि रास्वपा संग भएको २२ सांसद १ सय ११ मा जोडिदा कुलमा सांसदकाे संख्या १ सय ३३ हुन पुग्छ। र फेरि पनि नेपाली काङ्ग्रेस बहुमत पुर्याउन असफल हुन्छ। यसरी हेर्दा नेपाली काङ्ग्रेस यसपटक कयौं प्रयासका बाबजुद पनि प्रतिपक्षी दल बन्ने निश्चित देखिन्छ।
