चैत १४, काठमाडौं । नागरिक उन्मुक्ति पार्टी नाउपाले प्रदेश सरकार निर्माणमा समेत गठबन्धनलाई समर्थन गर्ने निर्णय गरेको छ ।
बुधबार नाउपा अध्यक्ष रञ्जिता श्रेष्ठको अध्यक्षतामा टीकापुरमा बसेको संस्थापक केन्द्रीय सदस्यको बैठकले संघ र प्रदेश सरकारमा एमाले, माओवादी र रास्वपासहितको गठबन्धनलाई समर्थन गर्ने निर्णय गरेको हो । २१ जना केन्द्रीय सदस्य मध्ये १२ जना सहभागी रहेको उक्त बैठकमा सबै तहको सरकारमा सत्ता गठबन्धनलाई समर्थन गरेर अघि बढ्ने निर्णय गरेको छ ।
यसअघि नाउपाका संरक्षक रेशमलाल चौधरी पक्षीय संस्थापक केन्द्रीय सदस्यको बैठकले प्रचण्ड नेतृत्वको सरकारलाई समर्थन नगर्ने निर्णय गरेको थियो तर अध्यक्ष श्रेष्ठले भने प्रचण्डलाई विश्वासको मत दिन ह्ववीप लगाएकी थिइन् ।
सुदूरपश्चिम प्रदेशमा संरक्षक रेशमलाल चौधरीको जोडबलमा नाउपाका पाँच जना सांसद कांग्रेस नेतृत्वको सरकारमा मन्त्री बनेका छन् ।अध्यक्ष श्रेष्ठले समर्थन फिर्ता लिन निर्देशन दिएपनि प्रदेश संसदीय दलले भने मुख्यमन्त्री कमलबहादुर शाहलाई नै समर्थन गर्ने निर्णय गरेको थियो ।
