चैत २२, काठमाडौं । गएराति भएको दिल्ली क्यापिटल र कोलकाता नाइट राइडर्स बिचको खेलमा दोस्रो ठूलो स्कोर बनेको छ।
जारी संस्करण इन्डियन प्रिमियर लिग ( आइपिएल ) मा बुधबार दिल्ली क्यापिटल्सविरूद्ध कोलकाता नाइट राइडर्सले २७२ रन बनाएको हो। उक्त स्कोर आइपिएल इतिहासकै दोस्रो ठूलो योगफल हो। २७२ रनको योगफल तयार पार्न सुनिल नारायणले ८५ रन बनाए। उनले ३९ बलमा ७ चौका र ७ छक्का प्रहार गरे।
त्यस्तै अंक्रिश रघुवंशीले २७ बलमा ५ चौका र ३ छक्का प्रहार गरी ५४ रन बनाए। खेलमा आन्द्रे रसेलले ४१, रिंकु सिंहले २६, कप्तान श्रीयास ऐयरले १८ र फिल साल्टले १८ रनको योगदान गरे । सर्वाधिक योगफल पनि जारी सिजनमै बनेको थियो। चैत १४ मा सनराइजर्स हैदरावादले मुम्बइ इन्डियन्सविरूद्ध ३ विकेटको क्षतिमा २७७ रन जोडेको थियो।
त्यस अघि सन् २०१३ मा रोयल च्यालेन्जर्स बैंग्लोरले पुने वारियर्सविरुद्ध ५ विकेटको क्षतिमा जोडेको २६३ रन आइपिएलको सर्वाधिक स्कोर थियो। गएरातिको खेलमा दिल्ली १०६ रनले पराजित भएको थियो। २७३ रनको लक्ष्य पछ्याएको दिल्लीले १७.२ओभरमा १६६ रन मात्रै बनाएर अल आउट भएको थियो।
