अमेरिकाले फिर्ता गरेका १० जना नेपाली काठमाडौंमा, प्रहरीले सोधपुछ गर्ने

काठमाडौं । अवैध रुपमा प्रवेश गरेर कागजातबिना बस्दै आएका १० नेपाली नागरिक बोकेको अमेरिकी चार्टर विमान त्रिभुवन अन्तर्राष्ट्रिय विमानस्थलमा अवतरण भएको छ ।

बुधबार बिहान करिब १० बजे उक्त विमान त्रिभुवन विमानास्थलमा अवतरण गरेको हो । नेपाल ल्याइएका त्यस्ता व्यक्तिहरूलाई प्रहरीले सोधपुछ गर्ने तयारी गरेको छ ।

त्रिभुवन अन्तर्राष्ट्रिय विमानस्थलका प्रवक्ता रिञ्जी शेर्पाका अनुसार अवैध रूपमा अमेरिकामा बसोबास गर्दै आएका उनीहरूलाई स्वदेश फर्काइएको हो ।

अमेरिकाबाट निष्कासित हुने १४ लाखमध्ये १३ सय ६५ नेपाली, धमाधम पक्राउ पर्दै अवैध आप्रवासी
डोनाल्ड ट्रम्पले गत जनवरी २० मा दोस्रो कार्यकालका लागि शपथ लिएसँगै अवैध आप्रवासीमाथि धरपकड तीव्र पारेको अमेरिकी प्रशासनले विशेष विमानमार्फत् बुधबार उनीहरूलाई नेपाल पठाइदिएको हो ।

हवाइ र स्थलमार्गबाट अमेरिका छिरेर अवैध रुपमा बस्दै आएका नेपालीको संख्या हजारौँ रहेको छ । जसमध्ये नेपाल फर्काउने सूचीमा करिब १८ सय जना छन् ।

अवैध आप्रवासी लखेट्ने अमेरिकी नीतिअनुसार कागजातविहीन नेपालीलाई पहिलोपटक विमान चार्टर गरी फर्काइएको हो ।

अमेरिकी राष्ट्रपति डोनाल्ड ट्रम्पले आप्रवासी विदेशी नागरिक निकाल्ने अभियानलाई तीव्र पारेका छन् ।

जनवरी २० मा अमेरिकाको ४७ औँ राष्ट्रपति बनेसँगै डोनाल्ड ट्रम्पले अवैध रुपमा आएका आप्रवासी लखेट्ने अभियान थालेका थिए ।

कागजातबिना बसेका लाखौँ आप्रवासीलाई कुनै पनि हालतमा निकालिछाड्ने अठोट लिएका ट्रम्पको निर्देशनपछि देशभर धरपकड अभियान चलाइएको थियो । यसअघि भारतबाट गएर अवैध रुपमा बसेकाहरूलाई अमेरिकी जहाजले तीन पटक फर्काइसकेको छ ।

अमेरिकाले १४ लाखभन्दा बढी अवैध आप्रवासीलाई स्वदेश फर्काउने प्रक्रिया थालिसकेको छ। अमेरिकास्थित अध्यागमन विभागले सार्वजनिक गरेको विवरणअनुसार संसारभरका १४ लाख ४५ हजार ५४९ जना आप्रवासीलाई निकाल्ने तयारी छ ।

यसरी निकालिनेहरूको सूचीमा एक हजार ३६५ जना नेपाली रहेका छन् । यो सूचीमा १७ हजार ९४० जना भारतीय छन् । उता चीनका भारतकोभन्दा दोब्बर अर्थात् ३७ हजार ९०८ जना छन् ।

दक्षिण एसियाको अर्को मुलुक बंगलादेशका चार हजार ८३७ जना भुटानका १२२ जना पाकिस्तानका सात हजार ७६० जना र श्रीलंकन तीन हजार ६५ जना छन्।

ट्रम्पको अभियानका कारण संसारभरबाट करोडौं खर्च गरेर अमेरिका छिरेका आप्रवासीको बिजोग हुन थालेको छ । अमेरिकी अध्यागमन तथा सीमा सुरक्षा अधिकारीलाई ट्रम्प प्रशासनले कागजातविहीन आप्रवासीलाई पक्राउ गर्ने क्रम तीव्र बनाउन भनिसकेको छ। पक्राउ परेकालाई हातखुट्टा दुवैमा सिक्रीले बाँधेर पठाउने गरिएको छ ।