काठमाडौं । बिहीबार बिहान ११ बजेका लागि डाकिएको प्रतिनिधिसभा बैठक अझै सुचारू हुन सकेको छैन ।
नेपाल विद्युत् प्राधिकरणका प्रबन्ध निर्देशकबाट कुलमान घिसिङलाई हटाउने सरकारको निर्णयको विरोध भएपछि बैठक बुधबार स्थगित भएको थियो । तर प्रमुख प्रतिपक्षीसहितका दलले अवरोध गरेपछि स्थगित भएको बैठक अझै सुरू हुन नसकेको हो ।
बैठक नियमित प्रक्रियाअनुसार अघि बढाउन सभामुख देवराज घिमिरेले संसद्मा प्रतिनिधित्व गर्ने सबै राजनीतिक दलका प्रमुख सचेतकसँग छलफल गरेका छन् ।
दलहरूबीच सहमति जुट्न नसक्दा प्रतिनिधि सभाको बैठक बस्ने समय नै परिवर्तन भएको छ । प्रतिनिधि सभाका महासचिव पद्मप्रसाद पाण्डेयले सूचना जारी गरेर बैठकको समय परिवर्तन गरेका हुन् ।
उनले बिहीबार बिहान ११ बजे बस्ने भनिएको संसद् बैठक दिउँसो २ बजेका लागि सारिएको सूचनामार्फत् जानकारी दिएका छन् ।
यसअघि संसद् सुचारुको प्रयासस्वरुप सभामुख घिमिरेले प्रमुख दलका प्रमुख सचेतकहरूसँग संसद् भवनमा छलफल गरेका थिए ।
तर कुलमानलाई हटाइएको प्रकरणमा प्रधानमन्त्रीको जवाफ मागिरहेका विपक्षीले अडान नछाड्दा हल निस्किन सकेको छैन । संसद्मा यसबारे ऊर्जामन्त्री दीपक खड्काले जवाफ दिने भनिए पनि विपक्षीले प्रधानमन्त्री खोजेका छन् ।
प्रतिपक्षी दलले घिसिङलाई हटाउने निर्णयबारे प्रधानमन्त्रीले संसदमा जवाफ दिनु पर्ने माग गरिरँहदा ओलीले झन् भड्किलो अभिव्यक्ति दिएका थिए ।
उनले एकजना कर्मचारी हटाउने सरकारको निर्णयमा संसद्मा जवाफ माग्ने कार्य अनुचित भएको बताएका छन् । आफूले घिसिङ हटाउने विषयमा संसद्मा जवाफ नदिने बुधबार नैबताइसकेका छन् । तर, प्रतिपक्षले प्रधानमन्त्री ओलीले संसद्मा उभिएर उचित जवाफ दिनुपर्ने गरिरहेका छन् ।
