रौतहट । जनता समाजवादी पार्टी (जसपा) नेपालको रौतहट जिल्ला अधिवेशन नजिकिँदै गर्दा जिल्ला अध्यक्षको उम्मेदवारको विषयमा चर्चापरिचर्चा तीव्र बनेको छ। विशेषगरी बौधिमाई नगरपालिकाका पूर्व नगर प्रमुख राजु (राजीव रंजन) यादवको नाम यस पदका लागि व्यापक रूपमा चर्चा भइरहेकामा ध्यान खिचिएको छ।
२०७४ सालको स्थानीय तहको निर्वाचनमा जसपाबाट बौधिमाई नगरपालिकाको मेयरमा निर्वाचित भएका यादवले आफ्नो कार्यकालमा उल्लेखनीय विकास कार्य सम्पन्न गरेका थिए। दोश्रो कार्यकालको लागि पनि उम्मेदवारी दिएका उनले थोरै मतान्तरले पराजय भोग्नुपरेको थियो।
राजनीतिमा समर्पित यादव सधैं नेता, कार्यकर्ता र जनताको सुख–दुखमा अग्रपंक्तिमा देखिन्छन्। यही कारणले पार्टी संगठनलाई बलियो बनाउन र जनताको भावना अनुसार काम गर्न सक्ने नेताका रूपमा उनलाई जिल्ला अध्यक्षको जिम्मेवारी दिनुपर्ने माग कार्यकर्ताहरूबाट उठेको हो।
यस विषयमा यादवले भने, “पार्टीका नेता र कार्यकर्ताको चाहनालाई सम्मान गर्दै म तयार छु। तर कुनै पनि जिम्मेवारी चुनावी प्रक्रियामार्फत नभई सर्वसम्मतबाट दिनु उचित हुन्छ।” साथै, उनले पार्टी हितलाई केन्द्रमा राखी शीर्ष नेताहरूले गर्ने निर्णय आफूलाई स्वीकार्य हुने स्पष्ट पारे।
पार्टीभित्रको एकता र संगठन सुदृढीकरणका दृष्टिले यादवको उम्मेदवारीले नयाँ उर्जा दिन सक्ने देखिएको छ।
