कार्यक्रममा विभिन्न क्षेत्रका विशिष्ट अतिथिहरूको उल्लेखनीय उपस्थिति रहेको थियो। समाज, सञ्चार, कृषि तथा उद्यम क्षेत्रका प्रतिनिधिहरूले ‘घराना बाईट्स’को स्थापना केवल एक व्यवसायिक प्रयास नभई समाजमै सकारात्मक परिवर्तन ल्याउने अभियान भएको धारणा राखे।
महानायक हमालले स्वदेशमै परम्परा र आधुनिकताको समिश्रणसहितको रेस्टुरेन्ट स्थापना हुनु गौरवको विषय भएको बताए। “घराना बाईट्सले स्वाद मात्र हैन, स्वास्थ्यप्रति समेत गम्भीर ध्यान दिएको देखिन्छ,” हमालले भने, “देशमै यस्ता उद्यम सुरु हुनु भनेको आर्थिक समृद्धितर्फको यात्रा हो।”
प्रसिद्ध सञ्चारकर्मी श्रीराम पुडासैनीले परम्परागत स्वादलाई आधुनिक ढंगले प्रस्तुत गरेकोमा प्रशंसा गर्दै यसले स्थानिय रोजगार सिर्जना गरेको बताए।
युवा कृषक दीपक न्यौपानेले घराना बाईट्सले अर्गानिक तथा ताजा खानेकुरा सिधै किसानबाट ग्राहकसम्म पुर्याउने प्रयत्न गरेको भन्दै ग्राहक र कृषक दुवैको हितमा काम भएको बताए।
समारोहका संयोजक तथा समाजसेवी पुष्कर राज पाण्डेले विदेशमा रहेका नेपाली युवाहरूलाई स्वदेशमै केही गर्न प्रेरणा दिने प्रयास भएको बताए। “हरि सुवेदी जस्ता युवाहरू स्वदेश फर्केर केही गर्न चाहन्छन् भने नेपाललाई स्वावलम्बी बनाउन सकिन्छ,” उनले भने।
रेस्टुरेन्टका सञ्चालक हरि सुवेदीले झन्डै ३० वर्ष विदेशमा बसेर आर्जन गरेको सीप र अनुभवलाई स्वदेशमै प्रयोग गर्न थालेको बताए। उनले ‘घराना बाईट्स’मार्फत स्वादिलो, स्वच्छ र स्वास्थ्यप्रद खानाको अनुभव दिन चाहेको बताए।
कार्यक्रमको सञ्चालन पत्रकार सावित्री बस्नेतले सुमधुर शैलीमा गरेकी थिइन्, जसले उपस्थित सबैलाई आकर्षित गर्यो। समारोहमा दर्जनौँ विशिष्ट पाहुनाहरू, स्थानीय बासिन्दा र सञ्चारकर्मीहरूको उल्लेख्य उपस्थिति रहेको थियो। 
घराना बाईट्स अब बुढानीलकण्ठ क्षेत्रको नयाँ आकर्षण बन्ने विश्वास गरिएको छ, जहाँ स्वाद, स्वास्थ्य र संस्कृतिको मिठो संगम पाइनेछ।
