काठमाडौं, वैशाख १४ । काठमाडौं महानगरपालिकाका उपमेयर सुनिता डंगोलले आफ्नो ३ वर्षे कार्यकाल नजिकिँदै गर्दा पहिलोपटक खुलेर मेयर बालेन शाह, अख्तियार दुरुपयोग अनुसन्धान आयोग र महानगरभित्रका अनियमितता विरुद्ध आवाज उठाएकी छन्।
शनिबार बिहान सञ्चारकर्मीहरूसँग गरेको संवादमा डंगोलले पाँच मुख्य बुँदामा आफ्नो असन्तुष्टि र मागहरू राखेकी छन्। उनले आफू निर्वाचित भएर आए पनि व्यवहारमा अधिकार नभएको गुनासो गरेकी छन् भने अख्तियारको निष्क्रियतामाथि प्रश्न उठाएकी छन्।
१. अख्तियार किन चुप छ?
डंगोलले महानगरभित्रका अनियमितता र भ्रस्टाचारका मुद्दामा अख्तियार दुरुपयोग अनुसन्धान आयोग मौन रहेको भन्दै निष्पक्ष छानबिनको माग गरिन्।
२. भ्यू टावर औचित्यहीन
पुरानो बसपार्कमा निर्माण भइरहेको भ्यू टावर जनताको हितमा नभएको स्पष्ट पार्दै डंगोलले व्यापारिक प्रयोजनका लागि महानगरले संरचना बनाउनु अनुचित भएको बताइन्।
३. कार्यपालिका बैठक किन बस्दैन?
महानगरको कार्यपालिका बैठक पुस ८ यता नबसेको उल्लेख गर्दै उनले एजेन्डा र फाइलहरूको चाङ लागिरहेको बताइन्। मेयर बालेनसँग बैठक आह्वानका लागि समन्वय प्रयास गरिरहेपनि सफल नभएको उनले बताइन्।
४. १७ सेकेन्डको भिडिओको पूरा फुटेज माग
डंगोलले भ्यू टावर निर्माणमा घुस प्रस्तावको अडियो क्लिपको १७ सेकेन्डको फुटेज सुनियोजित रूपमा सार्वजनिक गरिएको बताउँदै त्यसको सम्पूर्ण फुटेज सार्वजनिक गर्न माग गरिन्।
५. उपमेयरको अधिकार सीमित, सुधारको आवश्यकता
तीन वर्षको अनुभवका आधारमा डंगोलले निर्वाचित उपमेयरको भूमिकालाई संविधान र कानूनी रूपमा अझ सशक्त बनाउनुपर्ने आवश्यकता देखिएको बताइन्। “निर्वाचित बनाइएको भए पनि व्यवहारमा सेलेक्टेड जस्तो बनाइएको छ,” डंगोलले गुनासो गरिन्।
डंगोलले काठमाडौं महानगर र देश विधि प्रक्रिया र सुशासनका आधारमा चल्नुपर्नेमा जोड दिँदै, आफु सधैं ‘बहुजन हिताय, बहुजन सुखाय’को भावनामा काम गरिरहेको बताइन्।
