डोनाल्ड ट्रम्पले अलकाट्राज जेल पुनः खोल्ने घोषणा, ‘अत्यन्त खतरनाक अपराधीहरूलाई त्यही राखिने’

काठमाडाैं, २२ वैशाख । अमेरिकाका पूर्व राष्ट्रपति तथा पुनः राष्ट्रपति पदका उम्मेदवार डोनाल्ड ट्रम्पले आइतबार ऐतिहासिक अलकाट्राज जेल पुनः निर्माण गरी सञ्चालनमा ल्याउने घोषणा गरेका छन्। उनले सामाजिक सञ्जाल Truth Social मा लेख्दै, “REBUILD, AND OPEN ALCATRAZ!” भन्ने घोषणासँगै यसबारे विस्तृत निर्देशन जारी गरेका छन्।

“आज म जेल प्रशासन ब्यूरो (Bureau of Prisons), न्याय विभाग (Department of Justice), एफबीआई (FBI) र गृहमन्त्रालय (Department of Homeland Security) लाई निर्देशन दिँदैछु कि अलकाट्राजलाई पुनःनिर्माण गरी निकै ठूलो क्षमताको रूपमा पुनः खोलियोस्, जहाँ अमेरिका भरिका सबैभन्दा खतरनाक र हिंसात्मक अपराधीहरूलाई राख्न सकियोस्,” ट्रम्पले भनेका छन्।

अलकाट्राजको इतिहास

क्यालिफोर्नियाको सान फ्रान्सिस्को तटबाट करिब २ किलोमिटर टाढा रहेको यो जेल सन् १९३४ मा खोलिएको थियो र २९ वर्षपछि १९६३ मा अत्यधिक खर्चका कारण बन्द गरिएको थियो। यो जेलमा कुख्यात माफिया नेता अल कापोनजस्ता अपराधीहरू राखिएका थिए। यहाँबाट कैयौंपटक आश्चर्यजनक तरिकाले भाग्ने प्रयासहरू भएको पाइन्छ, जसमा १९६२ मा फ्र्यांक मोरिससहित तीन कैदी भागेका थिए, जुन घटनालाई लिएर Escape from Alcatraz फिल्म समेत बनेको थियो।

अलकाट्राजमा जम्मा ३३६ जना कैदी राख्न मिल्थ्यो। टापुको पृथक स्थानका कारण दैनिक उपभोग्य वस्तुहरू—खाद्य सामग्री, इन्धन, पिउने पानी लगायत सबै कुरा टापुमा पु-याउनुपर्ने भएकाले सञ्चालन खर्च अत्यन्तै महँगो पर्ने गरेको थियो। त्यसबाहेक भौतिक संरचना मर्मतका लागि $३ देखि $५ मिलियन अमेरिकी डलरसम्म खर्च लाग्ने अनुमान गरिएको थियो।

१९७३ देखि यो स्थल एक पर्यटकीय केन्द्रको रूपमा विकास गरियो र हाल यो अमेरिका भित्रकै लोकप्रिय राष्ट्रिय पार्क तथा पर्यटकीय स्थल बनेको छ, जहाँ हरेक वर्ष झन्डै १० लाख पर्यटक पुग्ने गरेका छन्।

ट्रम्पको योजना र राजनीतिक आलोचना

डोनाल्ड ट्रम्पले अपराध नियन्त्रणलाई आफ्नो दोस्रो कार्यकालको मुख्य एजेन्डा बनाएका छन्, विशेषगरी अप्रवासीद्वारा गरिएका अपराधप्रति। उनले लेखेका छन्, “हामी जब गम्भीर राष्ट्र थियौं, त्यतिबेला खतरनाक अपराधीहरूलाई समाजबाट टाढा राखिन्थ्यो। अब समय आइसकेको छ—सडकमा हिंसा, अपराध र अराजकता फैलाउने सीरियल अपराधीहरूलाई सजाय दिलाउने।”

तर, यस घोषणालाई डेमोक्र्याटिक नेतृ तथा पूर्व सभामुख न्यान्सी पेलोसीले गम्भीर प्रस्ताव नभएको भन्दै खण्डन गरेकी छिन्। उनले सामाजिक सञ्जाल X मा लेखेकी छन्, “अलकाट्राज अहिले अमेरिका भित्रकै एक प्रमुख पर्यटकीय आकर्षण बनेको छ। ट्रम्पको प्रस्ताव गम्भीर छैन।”

अन्तर्राष्ट्रिय चिन्ता

ट्रम्प प्रशासनले एल साल्भाडोरमा अपराधी पठाएर त्यहाँका जेलहरूमा राख्न रकम दिएको, साथै खतरनाक अमेरिकी अपराधीहरूलाई पनि त्यस देशमा पठाउन सकिने भन्दै योजना बनाएको बताइएको छ। उनले सन् १७९८ को Enemies Act समेत प्रयोग गर्दै केही आप्रवासीलाई युद्धकालको कानुनअनुसार देश निकाला गर्न खोजेको आरोप लागेको छ।

संयुक्त राष्ट्रसंघका मानव अधिकार विशेषज्ञहरूले हालै नै अमेरिका सरकारले भेनेजुएला र एल साल्भाडोरका २५० भन्दा बढी आप्रवासीलाई कानुनी प्रक्रिया बिना नै निर्वासन गरेको भन्दै चिन्ता व्यक्त गरेका छन्।