काठमाडौं- फिफा विश्वकपको फाइनलमा नेपाली समयअनुसार सोमबार बिहान स्पेन र अर्जेन्टिना आमनेसामने हुँदैछन् ।
उक्त उपाधि भिडन्तमा मैदानमा खेलाडीबीच मात्रै होइन, दुई प्रशिक्षकबीच पनि विशेष प्रतिस्पर्धा हुने भएक छ।
स्पेनका प्रशिक्षक लुइस डे ला फ्युएन्ते र अर्जेन्टिनाका प्रशिक्षक लियोनेल स्कालोनी गुरू–शिष्यको सम्बन्धमा बाँधिएका छन्।
नौ वर्षअघि स्कालोनी स्पेनको राजधानी म्याड्रिड नजिकै रहेको लास रोजासस्थित स्पेनिस फुटबल महासंघको प्रशिक्षण केन्द्रमा व्यावसायिक प्रशिक्षकको लाइसेन्सका लागि अध्ययन गर्थे। त्यतिबेला उनलाई प्रशिक्षण दिने शिक्षक डे ला फुएन्ते नै थिए।
त्यसयता दुवैवजनाले अन्तर्राष्ट्रिय फुटबलमा सफल प्रशिक्षकका रूपमा आफूलाई स्थापित गरेका छन्।
४८ वर्षीय स्कालोनीले सन् २०१८ अगस्टमा अर्जेन्टिनाको प्रशिक्षकको जिम्मेवारी सम्हालेका थिए। त्यसपछि उनले अर्जेन्टिनालाई २०२१ को कोपा अमेरिका जिताएर २८ वर्ष लामो उपाधि खडेरी अन्त्य गराए।
त्यसपछि सन् २०२२ मा विश्वकप जिताए भने २०२४ मा अर्को कोपा अमेरिका उपाधि पनि दिलाए।
यता ६५ वर्षीय डे ला फुएन्ते सन् २०२२ डिसेम्बरमा स्पेनको मुख्य प्रशिक्षक नियुक्त भएका थिए।
उनको नेतृत्वमा स्पेनले २०२४ को युरोकप जित्यो र त्यसपछि यूईएफए नेसन्स लिगको फाइनलसम्मको यात्रा तय गर्यो।
फ्रान्सविरुद्धको प्रभावशाली सेमिफाइनल जितपछि उनी अहिले स्पेनलाई दोस्रो विश्वकप उपाधि दिलाउने संघारमा छन्।
एकअर्काप्रति सम्मान
फाइनलअघि दुवै प्रशिक्षकले एकअर्काप्रति सम्मान व्यक्त गरेका छन्। इङ्ल्यान्डविरुद्ध जितपछि स्कालोनीले भने, ‘उहाँ मेरा गुरु हुनुहुन्थ्यो। मैले जानेका धेरै कुरा उहाँबाट सिकेको हुँ। अहिले विश्वकपको फाइनलमा उहाँविरुद्ध खेल्न पाउनु विशेष क्षण हो।’
स्कालोनीले कतार विश्वकपपछि प्रशिक्षकहरूको सम्मेलनमा डे ला फुएन्तेसँग लामो छलफल भएको स्मरण गर्दै स्पेनको वर्तमान टोलीको पनि खुलेर प्रशंसा गरे।
स्कालोनीको स्पेनसँग गहिरो सम्बन्ध छ। उनले खेलाडी जीवनको अधिकांश समय अर्जेन्टिनी कप्तान लियोनेल मेस्सीजस्तै स्पेनमा बिताएका थिए। उनकी पत्नी एलिसा मोन्तेरो स्पेनी नागरिक हुन् । अहिले उनीहरू परिवारसहित स्पेनकै मल्लोर्कामा बस्दै आएका छन्।
तर फाइनलमा भने भावनाभन्दा देश पहिलो हुने उनले स्पष्ट पारे। ‘सबैलाई थाहा छ, म स्पेनमा बस्छु, मेरो परिवार पनि स्पेनी हो। तर म डे ला फुएन्तेलाई हराउने प्रयास गर्नेछु,’ उनले भने।
यता डे ला फुएन्तेले पनि स्कालोनीलाई आफूले पाएका उत्कृष्ट विद्यार्थीहरूमध्ये एकका रूपमा स्मरण गरेका छन्।
‘लियोनेलप्रति मेरो ठूलो सम्मान छ। उनले अर्जेन्टिनासँग सबै प्रमुख उपाधि जितिसकेका छन्। उनका धेरै विचारसँग म सहमत छु। व्यावसायिक र व्यक्तिगत दुवै रूपमा म उनको प्रशंसा गर्छु,’ उनले भने।
स्कालोनी अध्ययनका क्रममा निकै मिहिनेती, जिज्ञासु र सिक्न उत्सुक विद्यार्थी रहेका पनि उनले बताएका छन् ।
‘उहाँको शिक्षक हुन पाउनु मेरो लागि सम्मानको कुरा हो। तर त्योभन्दा पनि ठूलो कुरा, उहाँ मेरो असल साथी हुनुहुन्छ। आज पनि हाम्रो सम्बन्ध र आपसी सम्मान उत्तिकै बलियो छ,’ डे ला फुएन्तेले भने।
