एन्जल्स हार्ट ‘जुनियर क्रिकेट लिग–२०८३’ सुरु, बाग्मती प्रदेशका भौतिक पुर्वाधार मन्त्री बज्राचार्यद्धारा उदघाटन

काठमाडौं । विद्यालयस्तरबाट प्रतिभावान क्रिकेट खेलाडी उत्पादन गर्ने उद्देश्यसहित ‘जुनियर क्रिकेट लिग (जेसीएल)–२०८३ : इन्टर स्कुल इन्डोर क्रिकेट प्रतियोगिता’ आजदेखि सुरु भएको छ। एन्जल्स हार्ट नेशनल स्कुलको आयोजनामा तारकेश्वर नगरपालिका–९, मनमैजुस्थित एन्जल्स स्पोट्र्स कम्प्लेक्स (ए–१ इन्डोर) मा यो प्रतियोगिता सुरु भएको हो।

प्रतियोगिताका मुख्य विशेषताहरू:

• अवधि: साउन २४ गतेदेखि २८ गतेसम्म (टी–१० इन्डोर क्रिकेटको लिग तथा नकआउट प्रणालीमा सञ्चालन)

• व्यवस्थापन: एन्जल्स स्पोट्र्स एकेडेमी एण्ड रिक्रिएसन सेन्टर

• विशेष सहयोग: नेपाल प्रिमियर लिग (एनपीएल) टोली ‘काठमाडौं गोर्खाज’

• सहभागिता: काठमाडौं उपत्यकाका २४ विद्यालयका २५० भन्दा बढी विद्यार्थी खेलाडीहरू

• कुल अनुमानित खर्च: करिब ६ लाख १० हजार रुपैयाँ

उद्घाटन कार्यक्रम र रोमाञ्चक क्षण

बागमती प्रदेशका भौतिक पूर्वाधार मन्त्री शैलेन्द्रमान बज्राचार्यले एक समारोहबीच प्रतियोगिताको उद्घाटन गर्नुभयो। उद्घाटन कार्यक्रमको पहिलो बलमै राष्ट्रिय क्रिकेट टोलीका पूर्वखेलाडी तथा काठमाडौं गोर्खाजका प्रमुख शरद भेषावकरको बलिङमा मन्त्री बज्राचार्य ब्याटिङ गर्दै आउट भएपछि उद्घाटन समारोह निकै रोमाञ्चक र उत्साहवर्धक बनेको थियो।

एन्जल्स हार्ट नेशनल स्कुलका अध्यक्ष लिलबहादुर पुनको अध्यक्षतामा भएको उद्घाटन समारोहमा विभिन्न खेलक्षेत्रका विशिष्ट व्यक्तित्वहरूको उपस्थिति रहेको थियो।

मन्त्री बज्राचार्यको भनाइ: “सरकारले गर्नुपर्ने काम विद्यालयले गर्दैछ”

प्रतियोगिताको प्रशंसा गर्दै मन्त्री बज्राचार्यले राज्यले गर्नुपर्ने महत्वपूर्ण काम विद्यालयले गरिरहेको बताउनुभयो। उहाँले भन्नुभयो,

“विद्यालय तहबाटै क्रिकेट खेलाडी उत्पादन गर्ने र खेलको विकासका लागि वातावरण बनाउने काम आफैँमा महत्वपूर्ण छ। क्रिकेट मैदानको भौतिक पूर्वाधार निर्माण तथा विकासका लागि प्रदेश सरकारबाट गर्न सकिने सहयोग र सहकार्यका विषयमा हामी सकारात्मक छौँ।”

साथै, क्रिकेटको प्रवद्र्धनका लागि विद्यालय, स्थानीय तह, प्रदेश सरकार र निजी क्षेत्रबीच सहकार्य अपरिहार्य रहेको उहाँले औंल्याउनुभयो।

सहभागी विद्यालयहरू

प्रतियोगितामा डीएभी स्कुल (दुई टोली), भ्याली पब्लिक स्कुल, एन्जल्स हार्ट नेशनल स्कुल, एन्जल्स हार्ट सेकेन्डरी स्कुल, क्रियटिभ एकेडेमी, केएमसी स्कुल, ज्ञानोदय बालबाटिका, त्रिलोक विद्यालय, नवोदित स्कुल, मानसिंह स्कुल, स्कलर्स होम एकेडेमी र हिमालयन ह्वाइट हाउस आईबी वल्र्ड स्कुल सहभागी छन्।

यसैगरी, चेल्सी वल्र्ड स्कुल, पुष्पसदन बोर्डिङ सेकेन्डरी स्कुल, आरम्भ एकेडेमी, जेम्स स्कुल, एसिया प्यासिफिक स्कुल, सत्य साई स्कुल, गम्भीर समुद्र सेतु माध्यमिक विद्यालय, प्यारामाउन्ट एकेडेमी, सेलिब्रेसन को–एड स्कुल, मनमैजु स्कुल तथा नेरिक एकेडेमीले पनि प्रतियोगितामा प्रतिस्पर्धा गर्नेछन्।

पुरस्कार तथा सम्मान

विद्यालय क्रिकेटको दिगो विकास र नयाँ प्रतिभा पहिचान गर्ने लक्ष्य राखिएको यस प्रतियोगिताका विजेता र उपविजेताले प्राप्त गर्ने पुरस्कारहरू यसप्रकार छन्:

यसका अतिरिक्त प्रतियोगितामा उत्कृष्ट खेलाडी, उत्कृष्ट ब्याटर, उत्कृष्ट बलर, उदयीमान खेलाडी र फेयर प्ले अवार्डसमेत प्रदान गरिनेछ।