काठमाडौं । सार्क चेम्बर अफ कमर्स एन्ड इन्डस्ट्री (सार्क सीसीआई) को पर्यटन समिति संयोजकमा नेपाल उद्योग वाणिज्य महासङ्घका निवर्तमान अध्यक्ष एवं आइएमई समूहका अध्यक्ष चन्द्रप्रसाद ढकाल चयन भएका छन् । माल्दिभ्समा सम्पन्न सार्क चेम्बरको ८८औँ कार्यकारी समितिको बैठकले ढकाललाई उक्त जिम्मेवारी प्रदान गरेको हो ।
पर्यटन क्षेत्रमा लगानी र पूर्वाधार विकासमा सक्रिय ढकाल चन्द्रागिरि हिल्सलगायत नेपालका सातवटै प्रदेशमा पर्यटन पूर्वाधार विकास तथा ‘इला’ होटल चेन ब्रान्डको प्रवर्द्धनमा संलग्न छन् ।
नवनियुक्त संयोजक ढकालले दक्षिण एसियाको भौगोलिक बनावट र सांस्कृतिक विविधता विश्वमै अद्वितीय रहेकाले यस क्षेत्रलाई उत्कृष्ट पर्यटकीय गन्तव्यका रूपमा विकास गर्न सकिने बताएका छन् । सगरमाथाको हिमशृङ्खलादेखि हिन्द महासागरका टापु, समुद्री तट, जङ्गल, मरुभूमि तथा धार्मिक र ऐतिहासिक सम्पदाले दक्षिण एसियामा पर्यटनको ठूलो सम्भावना रहेको उनको भनाइ छ ।
विश्वको करिब एक चौथाइ जनसङ्ख्या बसोबास गर्ने दक्षिण एसिया आफैँमा विशाल आन्तरिक पर्यटन बजार रहेको उल्लेख गर्दै उनले पर्यटन पूर्वाधारको स्तरोन्नति र लगानी विस्तारमा जोड दिएका छन् ।
क्षेत्रीय पर्यटन प्रवर्द्धनका लागि ‘सार्कभित्रै घुमौँ’ अवधारणासहित अन्तरक्षेत्रीय पर्यटन अभियान सञ्चालन गर्नुपर्ने उनको धारणा छ । यसका लागि सार्क राष्ट्रका पर्यटकीय गन्तव्य समेटेर साझा पर्यटन सर्किट तथा प्याकेज निर्माण गर्न सकिने उनले बताएका छन् ।
त्यस्तै, धार्मिक, सांस्कृतिक, पर्यावरणीय तथा साहसिक पर्यटनको आदानप्रदान बढाउनुपर्ने र सार्क राष्ट्रका प्रमुख सहरबीच सीधा हवाई तथा स्थलमार्गको पहुँच विस्तार गर्नुपर्नेमा उनले जोड दिएका छन् । नेपालका अन्तर्राष्ट्रिय विमानस्थललाई सार्कका प्रमुख गन्तव्यसँग सीधा हवाई सम्पर्कमा जोड्न सके क्षेत्रीय पर्यटन विकासमा सहयोग पुग्ने उनको विश्वास छ ।
सार्क राष्ट्रका सरकार र निजी क्षेत्रबीच सहकार्य, नीतिगत समन्वय तथा व्यावसायिक साझेदारी विस्तारमा सार्क चेम्बरले पुलको भूमिका खेल्न सक्ने बताउँदै ढकालले दक्षिण एसियाको साझा पर्यटन विकास र समृद्धिका लागि परिणाममुखी भूमिका निर्वाह गर्ने प्रतिबद्धता व्यक्त गरेका छन् ।

