काठमाडौं । बौद्ध धर्मावलम्बीले विश्व शान्ति विहारमा आज चिवर दान उत्सव गरेका छन् । भिक्षुहरूले पालना गर्नुपर्ने नियमअनुसार असार पूर्णिमादेखि आश्विन पूर्णिमासम्म वर्षाबास बसेका भिक्षुलाई उपासकरउपासिका तथा दाताबाट नयाँ चिवर उपहारस्वरुप प्रदान गरेर उत्सव सम्पन्न गरिएको हो ।
विहारभित्र तीन महिनासम्म वर्षाबास पूरा गरेका भिक्षुको सम्मानमा विधि विधानपूर्वक उत्सव गरिएको हो । भिक्षुहरूले वर्षायामको समयमा यात्रा नगर्ने, विहारभित्र बौद्ध शिक्षा प्रवर्द्धन गरी धार्मिक गतिविधि गर्ने प्रचलन रहेको अखिल नेपाल भिक्षु महासङ्घका कोषाध्यक्ष बोधि ज्ञान महास्थविरले जानकारी दिए ।
यो कार्यसम्पादन गर्दा भिक्षुलाई सामान्य अवस्थाभन्दा केही कठिनाइ हुने बताउँदै उनले बुद्धका शिक्षा तथा उपदेशहरूको पालनाका क्रममा यस्ता धार्मिक गतिविधि गरिएको र यस्ता कार्यले समुदायलाई सत्मार्गमा जोड्ने बताए ।
विभिन्न अष्ट परिकार दान र उपासक÷उपासिकाबाट व्यक्तिगत आर्थिक दान प्रदान गरिएको उक्त कार्यक्रममा विभिन्न बौद्ध विहारका प्रमुख, भिक्षु भिक्षुणी, उपासक, उपासिका, बौद्ध महिला र युवा सङ्घसंस्थाका प्रतिनिधिसहित सरोकार भएकाको सहभागिता थियो । कार्यक्रममा बुद्धसम्बन्धी ज्ञानवर्द्धक भजन पञ्चशीलसहित धार्मिक गतिविधिसमेत गरिएको छ । विहारले मानव कल्याण तथा विश्व शान्तिका लागि बुद्ध शिक्षा र बुद्धका उपदेशको अभ्यास र प्रवर्द्धन गर्दै आएको जनाइएको छ ।
यसैबीच अन्तर्राष्ट्रिय बौद्ध गुरु एवं सातौँ सङ्घनायक भिक्षु ज्ञानपूर्णिक महास्थविरको ८५ औँ जन्मजयन्तीका अवसरमा विहारमा बुद्ध पूजा तथा प्रवचन गरिएको छ । सो अवसरमा उक्त विहारका संस्थापक समेत रहेका भिक्षु ज्ञानपूर्णिक महास्थविरले बौद्ध साहित्य तथा दर्शनका माध्यमबाट सामाजिक क्षेत्रमा पुर्याएका योगदानको समीक्षा गरिएको थियो ।
समग्र मानव कल्याण तथा विश्व शान्तिको कामनासहित पूजा गरिएको कार्यक्रममा शान्तिपूर्ण समाज निर्माणका लागि मानिस क्रोध, द्वेष, इष्या र मोह अन्त गरी एकापसमा भ्रातृत्व, सहअस्तित्व, मेलमिलाप तथा सहकार्य गर्न उपदेश दिइएको छ । रासस
