काठमाडौं । प्रमुख प्रतिपक्षी दलका नेता पुष्पकमल दाहाल प्रचण्डले प्रतिगामीहरू नारायणहिटी संग्रहालयको गेटैमा पुग्दा पनि सरकारको कार्यशैली नसुध्रिएको बताएका छन् ।
मंगलबार प्रतिनिधि सभामामा बोल्दै प्रचण्डले सरकारका कार्यशैलीका कारण जनतामा आक्रोशको आगो ज्यामितीय रूपमा बढेको दाबी पनि गरेका छन् ।
‘जनतामा आक्रोशको आगो ज्यामितीय रूपमा बढेको छ । यो लोकतन्त्रविरुद्ध प्रयोग हुने हो कि भन्ने प्रश्न उठेको छ । प्रतिगामीहरू नारायणहिटीको गेटैमा आइपुग्दा पनि सरकार सुध्रिएन’, उनले भने, ‘यसो भएपछि लोकतन्त्र जोखिममा पर्दैन त ? प्रदर्शनमा विदेशीको फोटो पनि देखाए होलान्, प्रदर्शन गरे होलान् । तर म त्यसलाई पहिलो ठान्दिनँ । जो उत्रिए पनि नेपाली नै हो । सरकारले यसलाई जनताको आक्रोशका रूपमा बुझ्नुपर्छ ।’
उनले कांग्रेस-एमालेतिर लक्षित गर्दै प्रतिगामी कदमविरुद्ध पहल नथाली अहंकार गरेर बसेको पनि बताए ।
