काठमाडौं । यो साता अर्थात् चैत १७ गतेदेखि २९ गतेसम्मको अवधि नेपाली शेयर बजारका लगानीकर्ताका लागि सुखद रह्यो ।
शेयर बजारमा चार दिन मात्र कारोबार हुँदा तीन दिन बजार बढ्यो भने एक दिनमात्र घट्यो । तर सामान्य अङ्कले घटेका कारण लगानीकर्ता खासै आत्तिनुपर्ने अवस्था रहेन ।
हरियाली छाएको शेयर बजार नेपाल स्टक एक्सचेञ्ज (नेप्से) साताभर समग्रमा ४० अङ्कले बढेको छ ।
अघिल्लो साताको बिहीबार २६६३.३० बिन्दुमा रहेको नेप्से यो साताको बिहीबारसम्म २७०३.३९ बिन्दुमा आइपुगेको छ । सातामा चार दिनमात्र कारोबार हुँदा बजार दैनिक औषतमा १० अङ्कले वृद्धि भएको छ ।
यो साता कारोबारमा पनि सुधार आएको छ । समग्र सातामा २६ अर्ब ६५ करोड ५० लाख ९६ हजार रुपैयाँ बराबरको कारोबार हुँदा दैनिक औषत ६ अर्ब ६६ करोड ३७ लाख ७४ हजार रुपैयाँ बराबरको शेयर किनबेच भएको छ ।
बजार खुला रहेको चार दिन अवधिमा पाँच करोड २१ लाख ८९ हजार ८७५ कित्ता शेयर कारोबार हुँदा दैनिक औषतमा भने एक करोड ३० लाख ४७ हजार २९८ कित्ता शेयर किनबेच भएको छ ।
यो सातामा दुई लाख ५५ हजार ८७५ पटक र दैनिक औषतमा ६३ हजार ९६९ पटक शेयर किनबेच भएको छ ।
कुन दिन कस्तो थियो बजार ?
साताको सुरुवातको दिन आइतबार नेप्सेमा हरियाली छायो । पहिलो दिन नेप्से २९.८२ अङ्कले बढेर २६९३.१२ बिन्दुमा पुग्यो ।
आइतबार नेप्से १.११ प्रतिशतले बढ्दा परिसूचक उच्चतम २७१८.९५ बिन्दु र न्यूनतम २६५७.८८ बिन्दुबीच रह्यो ।
सो दिन नेप्से परिसूचकमा हरियाली छाउँदा कारोबार रकममा पनि उल्लेखीय सुधार देखियो । आइतबार बजार बन्द हुँदा सात अर्ब ५६ करोड ८२ लाख २६ हजार रुपैयाँ बराबरको एक करोड ५५ लाख ७२ हजार ८६२ कित्ता शेयर ७६ हजार ३५४ पटक किनबेच भयो । आइतबार कारोबार अवधिभर ३२३ कम्पनीको शेयर किनबेच भएको थियो ।
सोमबार मुस्लिम धर्मावलम्बीहरूको ठूलो चाड ईद परेकाले सरकारले सार्वजनिक बिदा दिएको थियो । सर्वजनिक बिदा हुँदा बैंक तथा वित्तीय संस्थासँगै नेप्सेमा कारोबार पनि बन्द भएको थियो ।
एक दिनको बिदा पछि खुलेको बजारमा भने बजार बन्द हुँदा राताम्मे भयो । मङ्गलबार नेप्से १६.९५ अङ्कले घटेर परिसूचक पुनः २६७६.१७ बिन्दुमा झर्यो ।
उक्त दिन नेप्से ०.६२ प्रतिशतले घट्दा परिसूचक उच्चतम २६९६.५० बिन्दु र न्यूनतम २६५४.५७ बिन्दुमा पुगेको थियो ।
मङ्गलबार नेप्से घटेसँगै कारोबारमा पनि गिरावट आएको थियो । उक्त दिन पाँच अर्ब ७९ करोड ७७ लाख ९१ हजार रुपैयाँ एक करोड ६ लाख ७० हजार ६४९ कित्ता शेयर ५६ हजार ५४८ पटक किनबेच भएको थियो । मङ्गलबार दिनभरमा ३२० वटा कम्पनी कारोबारमा आएको थियो ।
एक दिन घटेको बजार बुधबार भने पुनः बढ्यो । बुधबार नेप्से २३.८६ अङ्कले बढेर २७०० बिन्दुमा आयो । उक्त दिन नेप्से ०.८९ प्रतिशतले बढ्दा परिसूचक उच्चतम २७१२.२५ बिन्दु र न्यूनतम २६६९ बिन्दुमा पुगेको थियो ।
बजार बढ्दा पनि बुधबार कारोबार भने सामान्य नै रह्यो । बुधबार पाँच अर्ब ४४ करोड ४४ लाख ३६ हजार रुपैयाँ बराबरको एक करोड चार लाख ४२ हजार ५८३ कित्ता शेयर ५३ हजार ८८४ पटक कारोबार भएको थियो । उक्त दिन बजार अवधिभर ३१८ वटा कम्पनी कारोबारमा आएको थियो ।
साताको अन्तिम शेयर बजार भने झिनो अङ्कको वृद्धिसहित बन्द भएको थियो । बिहीबार नेप्से ३.२३ अङ्कले बढेर २७०३.३९ बिन्दुमा पुगेको थियो । उक्त दिन नेप्से ०.१२ प्रतिशतले बढ्दा परिसूचक उच्चतम २७३२.८५ बिन्दु र न्यूनतम २७००.२३ बिन्दुमा पुगेको थियो ।
अन्तिम समयमा पनि बजार रातो हुन नसकेको बजारमा कारोबार भने उल्लेखीय वृद्धि भएको थियो । बिहीबार सात अर्ब ८४ करोड ४६ लाख ४२ हजार रुपैयाँ बराबरको एक करोड ५५ लाख दुई हजार ९९८ कित्ता शेयर ६९ हजार ८९ पटक किनबेच भएको थियो ।
बिहीबार दिनभरमा ३२४ वटा कम्पनीको शेयर कारोबारमा आएको थियो ।
