काठमाडौं । राष्ट्रिय युवा संघ काभ्रेद्धारा आयोजित दोस्रो संस्करणको खुल्ला फुटसल प्रतियोगिताको उपाधी क्लव चौंरी देउरालीले जितेको छ । बनेपा स्थित एबीएम फुटसल मैदानमा आज भएको फाइनल खेलमा पेनाल्टी सुटआउटमा एपीओ बनेपालाई ६–५ गोल अन्तरले पराजित गर्दै क्लव चौंरीले उपाधी जितेको हो ।
निर्धारित १५ मिनेटको खेल बराबरीमा सकिएपछि खेल पेनाल्टीमा पुगेको थियो। योसँगै विजेता क्लव चौंरी देउरालीले नगद ५० हजार सहित ट्रफी र प्रमाणपत्र प्राप्त गरेको छ । यस्तै उपविजेता एपीओ बनेपाले नगद २५ हजार सहित ट्रफी र प्रमाणपत्र प्राप्त गरेको छ । विजेता, उपविजेता र उत्कृष्ट खेलाडीलाई राष्ट्रिय युवा संघका अध्यक्ष क्षितिज थेबेले पुरस्कार वितरण गरेका छन् ।
पुरस्कार वितरण गर्दै अध्यक्ष थेबेले खेल क्षेत्रको प्रवद्र्धनका लागि युवा संघले रचनात्मक कार्य गर्दै आइरहेको बताए । खेल स्वास्थ्यका लागि समेत फाइदाजनक भएकाले शारिरिक तन्दुरुस्ती सँगै सकारात्मक सोचको विकासका लागि पनि खेल महत्वपुर्ण रहेको बताए । युवा संघ काभ्रेका अध्यक्ष इश्वर बल्लव सापकोटाले युवाको संकल्प, समृद्धिको यात्रा नारा सहित विभिन्न कार्यक्रम गर्दै आइरहेको जानकारी दिए । दोस्रो संस्करणको फुटसल प्रतियोगितामा युवाको सहभागीता र चासोले खेल क्षेत्रमा धेरै काम गर्न बाँकी रहेको स्पष्ट पारेको बताए । आगामी दिनमा खेल क्षेत्रको थप विकासका लागि युवा संघले निरन्तर आवाज उठाउने उनले बताएका छन् ।
कार्यक्रममा नेकपा एमाले काभ्रेका उपाध्यक्ष देवसागर लामा, केन्द्रिय सह–सचिव सन्देश चौंलागाँई लगायत युवा संघ नेपालका केन्द्रिय अध्यक्ष क्षितिज थेबे , सचिब महेश चौलागाइ , केन्द्रय सचिवालय सदस्य बिक्रम चौलागाई ,राकेश लामा स्थाई कमिटि सदस्य समुन्द्र तिमल्सिना ,नेताहरु रबिन्द्र गौतम , सागर रायमाझि लगायतको खेलाडीको उल्लेख्य उपस्थिती रहेको थियो । खुल्ला फुटसल प्रतियोगितामा ४४ टिम सहभागी थिए । कार्यक्रमको उद्घाटन नेकपा एमालेका पोलिट्व्युरो सदस्य एवं पुर्व मन्त्री गोकुल बाँस्कोटाले गरेका थिए ।
