२५ पुस, काठमाडौं । भक्तपुरको गठ्ठाघरमा सञ्चालित नागरिक अस्पतालले अत्याधुनिक उपकरण सहितको लेभल ३ आईसीयू सञ्चालनमा ल्याएको छ । ह्याम्स अस्पतालले व्यवस्थापन सम्हालेपछि लेभल–३ आईसीयू सेवा सञ्चालनमा आएको हो ।
सोमबार स्वास्थ्य मन्त्री प्रदीप पौडेल अस्पताल पुगी थपिएको नयाँ सेवाको उद्घाटन गरे ।
सो अवसरमा बोल्दै उनले स्थानीय नागरिकको पहुँचमा सेवा हुनु पर्नेमा जोड दिए । उनले भने, ‘समुदायलाई आफ्नो महसुस गराउने कोशिश गर्नुहोला । त्यसका लागि अस्पताल समुदायको पहुँचमा हुुनुपर्छ ।’
उनले गरीव तथा विपन्नका लागि १० प्रतिशत शैय्या निशुल्क हुनुपर्ने व्यवस्था कार्यान्वयन गर्न निजी अस्पतालहरुलाई आग्रह गर्दै सो सुविधा अन्तर्गत सेवा लिनेको नाम र फोटो समेत सार्वजनिक गर्न समेत आग्रह गरे ।
उनले गुणस्तरीय स्वास्थ्यका लागि आफू प्रतिवद्ध रहेको दोहोरयाँउदै स्वास्थ्य बीमा कार्यक्रमको पुर्नसंरचना गर्ने योजनामा सरकार अघि बढेको बताए ।
ह्याम्स अस्पताल तथा नागरिक अस्पताल अध्यक्ष रामशरण भण्डारीले गुणस्तरीय स्वास्थ्यका लागि निजी क्षेत्र सहयोगी बनेको बताए । निजी क्षेत्रको सेवामाथि प्रश्न उठ्ने विषयमा स्वास्थ्य संस्था वा अस्पतालहरुको ग्रेडिङ गर्नुपर्नेमा जोड दिए ।
उनले भने, ‘अस्पतालको ग्रेडिङ गर्ने नीति सरकारले लिनुपर्छ । बेडका आधारमा अस्पताल छुट्याउने प्रणाली पुरानो भयो। अब दिने सेवाका आधार छुट्याउनुपर्छ। त्यो अनुसार शुल्क पनि सरकारले नै तोकोस्। यसले बिरामी आफू कस्तो अस्पताल गइहेको छु भन्ने प्रस्ट हुन्छ ।’
आफू सरकारको सहयोगीका रुपमा रहेको बताउँदै कानुनको अक्षरस पालना गर्ने उल्लेख गरे ।
उनले आफू नागरिकको निगरानीमा सरकारको नीतिअनुसार चल्नुपर्छ भनेर आइपीओमा गएको समेत उल्लेख गरे ।
मध्यपुर थिमी नगरपालिकाका उपमेयर सुरेन्द्र श्रेष्ठले सरकारी अस्पतालले मात्रै नथेगिरहेको अवस्थामा नागरिक अस्पतालले भरथेग गर्ने बताए ।
उनले थपे, ‘नगरपालिकाले नेपाल-कोरिया मैत्री अस्पतालमा आधुनिक उपकरणसहित राम्रो सेवा दिने कोशिस गरिरहेको छ । अस्पतालमा ६ वटा आईसीयू छन् तर धान्न सकेको छैन । हामी थप गर्दैछौं। यो अस्पतालले पनि सेवा दिँदा थप सहयोग पुग्नेछ ।’
आइसियु विशेषज्ञ डा। अर्जुन कार्कीले आईसीयूमा भन्नेबित्तिकै बाँच्दैन भन्ने धारणा रहेको उल्लेख गरे । तर, त्यस्तो नभइ बिरामीलाई उपचार गरेर निको पार्न त्यहाँ राखिने गरेको र धेरै बिरामी निको भएर जाने गरेको बताए । उनले त्यसबारे बताउँदै थपे, ‘आईसीयूमा हामी त्यस्ता बिरामी राख्छौं, जसको कुन अंगले काम गर्न छाड्ने संकेत गर्छ वा छाडेको हुन्छ । त्यहाँ रहेका उपकरणबाट हस्तक्षेपकारी उपचार गरेर खतरामुक्त बनाइन्छ ।’
अस्पतालका मेडिकल डाइरेक्टर डा। कुन्दनसिंह कार्कीले अस्पताललाई अत्याधिनक उपकरणयुक्त बनाइरहेको बताए । उपचार सेवा र उपकरण दुवैका लागि भक्तपुरको पहिलो र उत्कृष्ट बनाउने लक्ष्यमा आफूहरु रहेको जानकारी दिए ।
ह्याम्स अस्पताल सञ्चालन गर्ने आरएस भण्डारी समूहले गत भदौ ताक मध्यपुर थिमि–३ गठ्ठाघरमा रहेको १ सय शय्याको नागरिक हस्पिटलको ४३ प्रतिशत सेयर स्वामित्व खरिद गरेको थियो । सो समूहले नागरिक हस्पिटल र नागरिक कलेज अफ हेल्थ साइन्सको ४३ प्रतिशत सेयर ९ करोड ९१ लाख रुपैयाँमा खरिद गरेको थियो ।
नागरिकसँग हाल १ सय शय्याको अस्पतालसँगै १२ रोपनी जग्गा र तीन तलाको नागरिक कलेज अफ हेल्थ साइन्सको सम्पति छ । नागरिक कलेज अफ हेल्थ साइन्सले बीएन, बीएससी नर्सिङ र एचएका शैक्षिक कार्यक्रम सञ्चालन गरिरहेको छ ।
