काठमाडौं । डेब्यू निर्देशक समर निरौलाको फिल्म ‘मम्मी’को प्रिमियरमा एक अप्रिय दृश्य देखियो ।
सुन्धारास्थित एक हलमा फिल्मका कलाकार र प्राविधिकहरूको परिचयपछि फिल्म प्रिमियर हुनै लागेको थियो । नायिका प्रियंका कार्की आक्रोशित मुद्रामा यता उता-यता हतारमा हिँड्न लागिन् ।
प्रिमियरको मुख्य आकर्षणमा रहेकी नायिका आक्रोश भएपछि उनीतर सबैको ध्यान गयो । अनि उनको आक्रोशको कारण थाहा भयो– नायक सुलक्षण भारती ।
नायक भारती फिल्म प्रिमियर हुनुअघि नै हलबाट बाहिरिएपछि यो खैलाबैला भएको हो । भारती हलबाट बाहिरिनुको कारण रहेछ– बोल्न नदिनू ।
प्रिमियरको कार्यक्रम सञ्चालक जेनिशा मोक्तान थिइन् । उनले फिल्म निर्देशक, नायिकाद्वय प्रियंका र दिया मास्केलाई अगाडि बोलाएर बोल्न दिइन् । भारतीलाई भने अगाडि मात्रै बोलाइन् तर बोल्न दिइनन् ।
फिल्मका केन्द्रीय पात्र रहेका भारतीलाई ‘बोल्न नदिनु’ अपमान लागेछ । उनी हलबाट बाहिरिए ।
प्रियंकालाई पनि भारतीलाई बोल्न नदिएको असन्तुष्टि रहेछ । भारतीको कदम सही लागेछ । उनले निर्देशकलाई फिर्ता बोलाउन दबाब दिइन् । यही लिङ्गरिङले लाइट बन्द भइ पर्दामा फिल्म सुरु हुन लाग्दै थियो । एकछिन कार्यक्रम रोकिए जस्तै भयो ।
पछि निर्देशक र निर्माता पूर्णिमा जोशीले भारतीलाई हलमा फर्काए । प्रियंका पनि खुसी देखिइन् । उनी भन्दै थिइन्, ‘मलाई रिस उठ्यो भने त यस्तै हो ।’
हलमा फर्किएपछि भारतीलाई बोल्न दिइयो । उनले आफ्नो रिस निर्देशकप्रति सांकेतिक रुपमा पोखे । भने, ‘भाइ (समर)ले फिल्म राम्रो बनाएको होला ।’
उनले फिल्मसँग जोडिएका स्पोन्सरप्रति कृतज्ञता व्यक्त गर्दै आफ्नो भनाइ सक्काए । फिल्मको कलाकार र निर्माण पक्षको नोकझोकको यो अप्रिय दृश्यपछि प्रिमियर सुरु भयो ।
