सुनसरी । नेकपा एमाले सुनसरीले आयोजना गरेको पार्टीको वडा केन्द्रित जरा अभियानमा ८० वर्षमाथिका ६८ ज्येष्ठ नागरिकलाई सम्मान गरिएको छ ।
अभियानअन्तर्गत शुक्रबार १०५ वर्षीय कृष्णमायादेवी कोइरालालगायत ८० वर्षमाथिका इनरुवा–५ का ६८ ज्येष्ठ नागरिकलाई सम्मान गरिएको जरा अभियानका प्रमुख अभियन्ता एमाले कोशी प्रदेश कमिटी सदस्य लोकेश निरौलाले जानकारी दिए ।
अभियानअन्तर्गत स्थानीय ९२ वर्षीय ज्येष्ठ नागरिक भवानीप्रसाद पोखरेललगायतले पार्टी सदस्यता नवीकरण गरेका थिए ।
‘सरकारले युवालक्षित कार्यक्रममा ध्यान देओस्’
नेकपा एमाले स्थायी कमिटी सदस्य तथा कोशी प्रदेशका पूर्व मुख्यमन्त्री भीम आचार्यले सरकारले युवालक्षित बजेट निर्माणमा ध्यान दिनुपर्ने बताएका छन् ।
वैदेशिक पलायन कम गर्न देशभित्रै युवालाई रोजगारीको सिर्जना गरिनुपर्ने आचार्यले बताए ।
आचार्यले ४ लेनको इनरुवा–दुहबी सडक खण्डलाई प्रदेशको गौरवको आयोजनाको रूपमा अगाडि बढाइएको बताए । उनले आफू मुख्यमन्त्री भएका बेला डिजाइन स्टिमेट गरेकाले ठेक्का लगाउन प्रदेश सरकारलाई निरन्तर ‘फलोअप’ गरिरहेको बताए ।
‘लोकतान्त्रिक व्यवस्था मजबुत बनाउने अभियान’
एमाले केन्द्रीय सदस्य तथा सुनसरी जिल्ला इञ्चार्ज जगदीश कुशियतले देशको लोकतान्त्रिक व्यवस्था मजबुत बनाउन पार्टी जनताको बीचमा निरन्तर लागि रहेको बताएका छन् ।
अभियानका क्रममा विकास निर्माण र जनसरोकारका विषयमा बृहत् छलफल र समाधानको प्रयत्न भएको कुशियतले बताए । उनले स्थानीय तहमा पार्टीको सबलीकरण र पार्टी जीवनको शुद्धीकरण र सुदृढीकरण गर्न अभियान सफल भएको बताए ।
एमालेको वडा केन्द्रित जरा अभियान गत फागुन २४ देखि अभिमुखीकरण र सदस्यता नवीकरण गरी सुरु गरिएको थियोे ।
