काठमाण्डौं । तारकेश्वर नगरपालिका वडा नं १० को सहयोगमा ‘परिवर्तनका निम्ति सहकार्य नेपाल’ ले आज लागूऔषध दुर्व्यसनी तथा आत्महत्या दुरुत्साहन सम्बन्धी सचेतनामूलक कार्यक्रम सम्पन्न गरेको छ ।
काठमाण्डौं उपत्यका प्रहरी कार्यालय रानीपोखरीका प्रहरी बरिष्ठ उपरिक्षक शेखर खनालको प्रमुख आतिथ्यतामा सम्पन्न कार्यक्रममा सोही कार्यालयका प्रहरी उपरिक्षक शालिग्राम शर्मा पौडेल र प्रहरी निरिक्षक शैलजा पाण्डेले लागूऔषध दुर्व्यसनी र आत्महत्या दुरुत्साहन सम्बन्धी कक्षाहरु सञ्चालन गर्नुभएको थियो ।
‘परिवर्तनका निम्ति सहकार्य नेपाल’ का अध्यक्ष एवं पत्रकार रबिन प्रसाद थपलियाको सभापतित्वमा सम्पन्न कार्यक्रममा प्रहरी कार्यालय बालाजुका प्रमुख, प्रहरी नायव उपरिक्षक ज्ञान बहादुर बिष्ट, तारकेश्वर नगरपालिका वडा नं १० का अध्यक्ष कुमार राई, मानसिंह धर्म मा.वि का प्रधानाध्यापक केदार गजुरेल, तारकेश्वर नगरपालिकाका कार्यपालिका सदस्य एवं वडा सदस्य शान्ता थपलिया, नगर कार्यपालिका सदस्य गिता परियार, तारकेश्वर नगरपालिका वडा नं १० का वडा सदस्य एवं कार्यक्रमका अनुगमन संयोजक बाबुराम पौडेल, वडा सदस्यहरु बिक्रम महर्जन र रत्नमायाँ परिवार, मानसिंह धर्म मा.विका विद्यालय व्यवस्थापन समितिका सदस्य मानबहादुर महर्जन, समाजसेवी नारायण मल्ल ठकुरी, मनमैजु युवा समाजका अध्यक्ष हिरालाल महर्जन, एश्वर्य नगर समाजका अध्यक्ष देवराज गौली, शिवनगर टोल सुधार समितिका अध्यक्ष गिर्वाण केसी लगायतको उपस्थिति रहेको थियो ।
कार्यक्रमको सञ्चालन चर्चित सञ्चारकर्मी कुसुम बज्राचार्यले गर्नुभएको थियो । कार्यक्रममा बोल्दै काठमाण्डौं उपत्यका प्रहरी कार्यालय रानीपोखरीका प्रहरी बरिष्ठ उपरिक्षक शेखर खनालले लागूऔषधको लतबाट युवाहरुलाई जोगाउनु अहिलेको मुख्य चुनौती रहेको बताउँदै त्यसका निम्ति समाज, परिवार र सबैबाट सहयोग हुनुपर्नेमा जोड दिनुभयो ।
कार्यक्रममा तारकेश्वर नगरपालिका वडा नं १० का अध्यक्ष कुमार राईले भौतिक विकासलाई भन्दा सामाजिक विकासका निम्ति वडा कार्यालयले विभिन्न कार्यक्रमहरु गरिरहेको बताउनुभयो । उहाँले समाजमा चुनौतीको रूपमा खडा भएको साईबर अपराध, लागूऔषध दुर्व्यसनी र आत्महत्या दुरुत्साहन लगायतका विषयमा वडाले कार्यक्रमहरु सञ्चालन गर्दै आइरहेको जानकारी दिनुभयो ।
सो अवसरमा मानसिंह धर्म मा.विका प्रधानाध्यापक केदार प्रसाद गजुरेलले लागूऔषधको प्रयोग बढ्दै गइरहेको बताउँदै त्यसले गर्ने असरलाई न्यूनीकरणका निम्ति सचेतना फैलाउनु जरुरी रहेको औंल्याउनुभयो । कार्यक्रममा सहभागी युवा तथा विद्यार्थीहरुले कार्यक्रम निकै महत्वपूर्ण रहेको बताउँदै यसबाट धेरै जानकारीहरु प्राप्त गरेको बताए ।
