राजन थापा
काठमाडौँ। काठमाडौँको कागेश्वरी मनोहरा–६, मुलपानीस्थित बिद्या अर्जन अंग्रेजी माध्यमिक विद्यालयमा ॐ समाज डेन्टल अस्पताल, बन्सथली शाखाको प्राविधिक सहयोगमा एक निःशुल्क दन्त स्वास्थ्य शिविर सफलतापूर्वक सम्पन्न भएको छ। विद्यालयको आयोजना र तारकेश्वर क्लब–६० को सह–आयोजनामा सम्पन्न यस शिविरमा ४ वर्षदेखि ६५ वर्ष उमेर समूहका विद्यार्थी, शिक्षक र अभिभावक गरी ठूलो संख्यामा व्यक्तिहरूले दन्त स्वास्थ्य सेवा प्राप्त गरे।
८७ प्रतिशत विद्यार्थीका दाँत कीराले प्रभावित
शिविरमा गरिएको परीक्षणका क्रममा ८७ प्रतिशत विद्यार्थीका दाँतमा कीरा लागेको पाइएको ॐ समाज डेन्टल बन्सथली शाखाकी प्रमुख सबिना पापन गुरुङले जानकारी दिइन्। यस तथ्यांकले बालबालिकामा दन्त स्वास्थ्य समस्याको भयावह अवस्थालाई उजागर गरेको छ।
विशेषज्ञ टोलीद्वारा सेवा प्रदान
दन्त परीक्षण तथा उपचार सेवामा डा. आशिका न्यौपाने, डा. सुदेसा, हाईजेनिष्ट रश्मि ढकाल, दन्त सहायक जुनु पण्डित र दुर्गा न्यौपाने सहितको विशेषज्ञ चिकित्सक टोली संलग्न थियो। टोलीले सहभागीहरूलाई आवश्यक परामर्श तथा उपचार सेवा प्रदान गर्यो।
विद्यालय प्रशासनद्वारा कृतज्ञता व्यक्त
विद्यालयका प्रधानाध्यापक घनेन्द्र भट्टराईले शिविरको सफलताप्रति खुसी व्यक्त गर्दै ॐ समाज डेन्टल अस्पतालको अनुभवी चिकित्सक टोली, सफल उपचार सेवा र समुदायप्रतिको समर्पित भावनाको प्रशंसा गरे।
विद्यार्थी स्वयंसेवकको महत्त्वपूर्ण भूमिका
शिविर व्यवस्थापनमा कक्षा ९ र १० का विद्यार्थीहरू सुश्रिया कार्की, आदित्य रानामगर, किस्न लामा, वर्षा श्रेष्ठ, मन्दुन राय र स्वेच्छा आचार्य ले स्वयंसेवकको रूपमा उल्लेखनीय भूमिका निभाए। उनीहरूले दर्ता, अनुशासन कायम, सूचना प्रवाह र समग्र व्यवस्थापनमा सहयोग पुर्याई शिविरलाई सफल बनाउन महत्त्वपूर्ण योगदान दिए। विद्यालयले उनीहरूको प्रयासको विशेष प्रशंसा गरेको छ।
समाजसेवी र पत्रकारलाई सम्मान
शिविर सफल बनाउन विशेष भूमिका खेल्ने तारकेश्वर क्लब–६० का अध्यक्ष तथा पत्रकार एवं सामाजिक अभियन्ता राजन थापा, ॐ समाज डेन्टलकी शाखा प्रमुख सबिना पापन गुरुङ र चिकित्सक टोलीलाई विद्यालयको तर्फबाट प्रशंसापत्र प्रदान गरियो। साथै, शिविरसम्बन्धी सूचना प्रवाहमा सक्रिय भूमिका निर्वाह गर्ने पत्रकार सन्तोष तिवारीलाई विशेष सम्मानसहित प्रमाणपत्र प्रदान गरिएको विद्यालय प्रशासनले जनाएको छ।
स्वास्थ्य र शिक्षाको सशक्त समन्वयमा जोड
८२७ भन्दा बढी विद्यार्थी अध्ययनरत र ६० जना शिक्षक कार्यरत बिद्या अर्जन अंग्रेजी माध्यमिक विद्यालयले हरेक वर्ष १०० प्रतिशत एसईई उत्तीर्ण दर कायम राख्दै आएको छ। विद्यालयले स्वास्थ्य र शिक्षाबीचको समन्वयलाई उच्च प्राथमिकता दिँदै यस्ता सामाजिक उत्तरदायित्वपूर्ण कार्यक्रमलाई निरन्तरता दिने प्रतिबद्धता व्यक्त गरेको छ। हालै विद्यालय र ॐ समाज डेन्टल अस्पतालबीच आपसी समझदारी (MoU) समेत सम्पन्न भएको छ, जसअन्तर्गत नियमित स्वास्थ्य क्याम्प तथा सचेतनामूलक गतिविधिहरू सञ्चालन गरिनेछ। यस सहकार्यले विद्यार्थी र समुदायको स्वास्थ्य चेतना अभिवृद्धिमा थप मद्दत पुग्ने अपेक्षा गरिएको छ।
