बनेपा, सानुकाजी थापा — पत्रकार तथा सामाजिक अभियन्ता राजन थापाले एकै दिन दुई महत्त्वपूर्ण सम्मान प्राप्त गरेर आफ्नो पत्रकारिता र समाजसेवाको योगदानलाई उच्च मूल्यांकन गराएका छन्।
बनेपामा आयोजित ‘सातौं संस्करणको किड्स अफ द इयर इन्टरनेशनल २०२५’ कार्यक्रममा थापालाई ‘उत्कृष्ट युवा पत्रकारिता पुरस्कार – २०२५’ प्रदान गरियो। यो सम्मान उनलाई जिल्ला समन्वय समिति काभ्रेका प्रमुख दीपक कुमार गौतम र अन्तर्राष्ट्रिय मोडल तथा फेसन प्रशिक्षक राज फैजुले संयुक्त रूपमा दिएका हुन्।
त्यसै दिन, काठमाडौंमा आयोजित अर्को एक कार्यक्रममा लायन्स इन्टरनेसनल डिस्ट्रिक्ट ३२५ I (MD ३२५), नेपालले उनलाई “सहयोगी लायन” (Supportive Lion) सम्मान प्रदान गरेको छ। उक्त सम्मान जिल्ला गभर्नर लायन पार्वती खरेल पाण्डेले प्रदान गरेकी हुन्।
विगत १० वर्षदेखि पत्रकारिता र सामाजिक कार्यमा सक्रिय थापाले विकृति, विसंगति, कला, संस्कृति, राजनीति र जनहितका विषयमा खोजमूलक समाचार प्रस्तुत गर्दै आएका छन्। उनी ओम समाज दन्त अस्पताल लगायतका स्वास्थ्य संस्थाहरूसँग मिलेर देशभर निःशुल्क स्वास्थ्य शिविर सञ्चालन गर्नमा पनि अग्रपंक्तिमा छन्। गत वर्ष ७९ वटा शिविर सञ्चालन गरेका उनले आगामी वर्ष १०० भन्दा बढी शिविर आयोजना गर्ने लक्ष्य राखेका छन्।
यसअघि पनि गिनिज वर्ल्ड रेकर्ड प्रमाणपत्र लगायत सयौं राष्ट्रिय तथा अन्तर्राष्ट्रिय सम्मान प्राप्त गरिसकेका थापाले यी सम्मानलाई जिम्मेवारीका रूपमा लिएको बताएका छन्। उनले भने, “यो गर्वको क्षण मात्र होइन, अझ ठूलो जिम्मेवारीको संकेत पनि हो। यसले मलाई अझ बढी जोशका साथ पत्रकारिता र समाजसेवामा लाग्न प्रेरित गर्नेछ।”
