काठमाडाैं । सात वर्षपछि चीन भ्रमणमा पुगेका भारतीय प्रधानमन्त्री नरेन्द्र मोदीले आज चिनियाँ राष्ट्रपति सी जिनपिङसँग ५० मिनेट लामो भेटवार्ता गरेका छन्।
भारतीय सञ्चारमाध्यमका अनुसार, मोदीले गत वर्ष कजानमा भएका उपयोगी छलफलले सम्बन्ध सुधारमा योगदान गरेको बताए। उनले सीमा क्षेत्रबाट सेना फिर्ता भएपछि शान्ति र स्थिरता कायम भएको, विशेष प्रतिनिधिहरूले सीमा मुद्दामा सहमति गरेको र कैलाश मानसरोवर यात्रा पुनः सुरु भएको जानकारी दिए। साथै, दुई देशबीच सिधा उडानहरू पनि पुनः सञ्चालनमा आएको उनले उल्लेख गरे।
मोदीले भारत–चीन सहकार्यले २.८ अर्ब जनतालाई फाइदा पुर्याउने र यसले मानवताको कल्याणमा योगदान दिने बताए। भेटपछि राष्ट्रपति सीले पनि मोदीसँग भेट पाउँदा खुशी लागेको र भारत–चीनको सहकार्य महत्त्वपूर्ण भएको बताए।
दुवै नेताले पारस्परिक विश्वास र सम्मानको आधारमा सम्बन्ध अगाडि बढाउने प्रतिबद्धता व्यक्त गरेका छन्। मोदीको चीन भ्रमणको उद्देश्य सीमामा शान्ति कायम गर्नु र द्विपक्षीय सम्बन्धलाई सुदृढ पार्नु हो।
भेटपछि मोदी तियानजिनमा हुने सांघाई सहयोग संगठन (एससीओ) को बैठकमा सहभागी हुनेछन्। यस शिखर सम्मेलनमा २० भन्दा बढी देशका नेताहरू सहभागी छन्। प्रधानमन्त्री मोदीले सोमबार रुसी राष्ट्रपति पुटिनसँग पनि भेटवार्ता गर्ने कार्यक्रम रहेको छ।
